Eanaš nuorat geat čađahit, dahket dan go ain leat nuoraidskuvllas. Muhto dat mii ii leat nu dábálaš lea ahte nuorat mearridit konfirmerejuvvot skuvllaid maŋŋá, nu go Tommy Ericsson Anti lea dahkan.

Lossa áigi

Ovdalgo galggai álgit rihppaskuvlii, de earráneaigga su váhnemat. Dát lei lossa áigi sutnje ja son šattai heajus millii. Ovtta lahkkai sus ii lean dilli ja iige hálidan dalle konfirmeret go šattai nu ollu mii dáhpáhuvai su birra.

Ii dat lean gal nu ahte masii iežas osku, muhtto mieđiha gal ahte muhtumin ledjen eahpádusas.

– Eai bat láve lohkat ahte Ipmil lea álo das go dárbbašat su. Ja mun han dárbbašin su veahkki. Maid galggan bargat? gosa galggan fárret?

Go ii ožžon mangelágan oainnáhusa, de smiehtai ahte ferte ieš vuos čoavdit dáid váttisvuođaid. Dál go lea fas fárren ruoktot, de mearrideigga áhčiin ahte galgá konfirmerejuvvot.

– Dál lean varra jagi áhččin háleštan konfirmašuvnna birra.

Treandda vuosttá

Norggas lea treanda leamaš maŋimuš jagiid ahte nuorat vuostildit dahje guđđet Kirku. Tommy Ericsson Anti ii beroš dađe eambbo das gal. Son ii leat goassige leamaš diekkár gii čuovvu maid earát dahket. Son dahkká maid ieš hálida.

– Biktasiin lean seammalágan. Muhttomin in beroš maid lean coggan, eará háve lean dego livččen náitaleamen.

Skihpáriid reakšuvnnat

Konfirmašuvdnii lea bovden ristváhnemiid ja bearraša, muhtto lea gal muitalan skihpáriidda ahte galgá konfirmerejuvvot. Skihpárat lohket vel "hæh, leat go duođas".

– Mun dajan "buorret maŋŋit, go ii goassige".

Ii dáhpáhuva nu dávjá

Seniorbáhppa Davvi-Hålogalandda bismagottis, Lars Henrik Haugan, muitala ahte ii lean hirbmástuvvan go oaččui dieđu konfirmašuvnna birra.

– Dát dáhpáhuvvá duollet dálle, muhtto ii leat gal dábálaš.

Haugan mielas lea buorre ahte boarrásat nuorat maid konfirmerejuvvot. Son muitala ahte 18-19 jahkásaččain álget jo rávisolbmo jurdagat ja leat smiehtan maid hálidit eallimis, hálidit go konfirmerejuvvot vai eai.

– Go dalle bohtet ruovttoluotta, de sii leat smiehtan dán birra guhkká. Dan mii dieđusge váldit duođas.