Mánnávuođa háliidus ollašuvvan

– Meastta in jáhke ahte viimmat lean almmuheamen dan! In leat vel ádden ahte lea duohta, reašká Inger Gaup.

Inger Karoline Gaup

Inger Karoline Gaup Sámi Grand Prixas 2011:s.

Foto: Kenneth Hætta

Guovdageaidnu nieida Inger Gaup (19) lea dál ollašuhttán iežas mánnávuođa niegu, go beassá almmuhit iežas vuosttaš skearru Sámi álbmotbeaivvi, guovvamánu 6. beaivvi.

– Sámi álbmotbeaivvi lea hui fiidná beaivi almmuhit skearru go dalle leat jo olu doalut dappe Guovdageainnus. Danne mun jurddašinge ahte háliidin juste dan beaivvi almmuhit dan, muitala Gaup.

«Sweet Love»

Skearru namma lea «Sweet Love», das lea 8 musihkkabihtá, okta dain lea luohti. Dán skearru šáŋŋer lea Country-Pop, ja Gaup lea čállán ja ráhkadan buot musihkabihtáid ieš. Son muitala ahte dása son lea čohkken iežas musihka maid lea dássážii ráhkadan.

– Lean vuordán dán almmuheami dan rájes go ledjen unni, go dát niehku lea mus leamašan hirbmat guhká. Dál lea dat niehku ollašuvvan, dat lea nu jalla somá! Illudan hirbmadit almmuhit dan! Dat šaddá hui speanta, lohká Gaup.

Son lávlu fáttáid birra mat mearkkašit juoidá sutnje, nugo ráhkisvuohta ja olmmáivuohta. Muitala maid ahte lea válljen daid lávlagiid, mat sutnje mearkkašit eanemusat. Ovttas lea namma «Sweet Love», danin son válljii dan skerrui.

Inger Karoline Gaup
Foto: privat

– Dan lávlagii liikon buoremusat, jáhkán ahte dat sáhttá šaddat ođđa «Hitta», muitala Gaup.

Olu barggu

Son muitala ahte lea leamašan ollu bargu ráhkadit skearru, ja dasa dárbbašuvvojit maiddái máŋga olbmo. Gaupas lea leamašan ovttasbargu buvttadeaddjiin Stein Austrudain, guhte lea buvttadan skearruid «Oslo Gospel Choir», Soveig Leithaug, Anita Skorgan ja Jan Groth ovddas. Dasa lassin lea vel buvttadan Ann-Mari Andersena lávlaga «Andagassii».

– Lea leamašan gudnin munnje go Svein lea háliidan muinna bargat. In lean goassige jáhkkán ahte unna Guovdageaidnu nieida dego mun, sáhtášii bargat dakkár buvttadeaddjiin, lohká Gaup.

Gaup lea leamašan mielde lávlumin 12 eará skearrus, ja olbmot maid leat oaidnán su sámi musihkkalávddiin. Son lea jo máŋga jagi lávlun ja juoigan, ja muitala ahte go lei unni de ii láven suovvat váhnemiiddis čuojahi CD-spillára biillas, go áiggui ieš juoigat.

Go lei 13 jagi boaris de álggii čuojahit gitára, ja dalle jo ráhkadišgođii ieš musihka.

– Mun lean álo liikon lávlut, ja lea leamašan niehkun mus dan rájes go ledjen unni, ahte beassat lávlut ja juoigat lávddis, muitala Gaup.

Muitaleamen juoidá

– Go mun čálán lávlagiid, de háliidan muitalit juoidá olbmuide. Lea somámus oaidnit ahte olbmot liikojit dasa maid sii gullet, lohká Gaup.

Sus lea álo leamašan ráhkisvuohta musihkkii. Dál sávvá ahte olbmot váldet bures vuostá su skearru, go almmuha dan Guovdageainnus boahtte vahkus.

– Buot teavsttaid, mat dán skearrus leat, daid lean ieš čállán, sávvamis olbmot liikojit daidda, lohká Gaup.

Guldal rádioreportáša Inger Karoline Gaupain dá: