Buohccidivššárstudeantta Anne Hedvig Salmi Nordsletta šattai guođđit mánáguovtto Isak Andreasa (5) ja Ailo Eliah (2) go vulggii Afrihkai bargohárjehallamii golmmá mánnui.

Mánná ii šat beroštan eatnis

Go smávvamánáeadni fas máhcai ruoktot de nuorat bártnáš ii orron šat sus berošteame.

5 jahkkásaš gal lei hirbmat ilus go eadni bođii, muhto nuorat bártnáš ii dahkan berošteame.

Anne Hedvig lohka ahte dát lea hui dábálaš ahte mánáin boahta diekkár reakšuvdna maŋŋel go eadni lea leamaš jávkan.

– Eadni lea fas mannan Afrihkai!!

Beannot vahkku manai ovdal Ailo Eliah fas čájehišgođii beroštumi eadnái.

Juovllaid áigge lihkká fas vuhttui ahte mánná ii leat vajálduhttán ahte eadni lei mannán.

Go bártnáš lei áhkus lusa báhcan oaneboddii de lei čirron ja čurvon ahte eadni lea fas mannan Afrihkai elefánttaid lusa.

Dál Anne Hedvig čilge mánáide dávjá ahte eadni ii leat šat vuolgimen Afrihkai, ja ahte sii galget leat fárrolaga juohke beaivvi.

In vuolgge šat ovdal mánát stuorruba

Vaikko lea leamaš sihke miellagiddevaš ja ávkkálaš fitnat Afrihkas bargohárjehallamis de ii loga Anne Hedvig šat vuolgit dohko ovdal go mánát stuorruba.

Anne Hedvig finádii Dáppe Dál studios. Guldal go son muitala iežas vásáhusaid birra.