NRK Meny
Normal

Makkár lea dán jagáš geassegákti oaidnit?

Dál han lea ge geassegávttit bivnnuhat Sámis, muhtimat leat gorron geassegávtti ja muhtimat leat easkka álgimin guorrut gávtti dál. Dás sii čilgejit iežaset gávttiid birra.

Aria Magga

Arla Magga iežas geassegávttiin.

Foto: Privat

Neeta Jaasko

Neeta Jääskö lea Anáris eret, ja son lea duojár.

Foto: privat

Anára duojár Neeta Jääskö muitala ahte son goarru dušše dalle go geavvá juoidá erenoamáš, ovdamearkka dihtii heajat. Muđui son goarru go sus lea dilli.

– Geassemánu gaskkamuttus dalle mun gal láven goarrut, áinnas goarun ođđa gávttiid alccen.

Muitala maiddái ahte dán jagáš geassegávttit galget čuovggáhallat ja dain leat hui ollu lieđđeminstarat.

Retro gákti

Anne Louise N. Gaup

Anne Louise N. Gaup bargá Sápmi parkas, ja lohká ahte livčče buorre jus bivalda, vuoi beassá coggat geassegávtti go vuolgá bargui.

Foto: Aila Káre Anti / NRK

Anne Louise N. Gaup mielas lea girjjat gávttit mas leat lieđđeminstarat bivnnuhat dán áigge. Son muitala maid ahte son ii leat ieš gorron gávtti, muhto lea ožžon olu gávttiid dálvet.

– Mus lea máŋga, mus lea sihke silkegákti ja diekkár mas lea rásit. Dat lea retro gákti maid lean ožžon iežan áhkko-rohkis, orru dego livččii1970 logu gákti, muitala Gaup.

Sáhppes dahje čuvgesalit ivnnit dat galget

Marit Ragnhild Nedrejord

Marit Ragnhild Nedrejord lohká sus ii leat geassegákti vuos, muhto ferte vuos goarrut.

Foto: Aila Káre Anti / NRK

Máret Ragnhild Nedrejord lohká ahte su mielas leat čuvges holberavddat, sáhppes dahje čuvgesalit ivnnit dat maid olbmot háliidit dál. Nedrejord lohká maid ahte son ii leat vuos gorron gávtti, muhto áigu dál goarrogoahtit gávtti alcces ja iežas niidii.

– Mun bijan gávttiide čuvges holberavddaid, muhto in leat vel mearridan makkár ivnni. Nubbi gákti šaddá diekkár sáhpeslágan ivnnis.

Nedrejord muitala ahte áigu geasset čiŋadit gávttiin heajaide.

Ii leat dušše okta gáktemálle

Máret Elle Teigen

Máret Elle Teigen lohká ahte son lea gorron earáide gávtti, muhto ii lean geassegákti.

Foto: Aila Káre Anti/ NRK

Máret Elle Teigen muitala ahte su mielas lea gáktemálle nu mo ieš háliidat hábmet gávtti, ahte ii leat dušše okta gáktemálle dán jagi.
Teigen muitala ahte son gal lea gorron earáide gávtti dán jagi, muhto lei dábálaš alit láđđegákti.

– Mus lea sáhppesrukses geassegákti ja diekkár áibbas ártegis ruoná ivdni, lohká Teigen ja čaibmá.

Teigen lohká ahte sus lea leamaš dušše oktii dán jagi badjelis geassegákti, ja dat lei konfirmašuvnnain ja ii dieđe goas son de fas čiŋadit gávttiin.

Ii liiko go gákti šealgá

Ruoŧa nieida Johanna Huuva muitala ahte su mielas leat stuorra lieđđeminsttar- ja šerres ivnnat gávttit hui bivnnuhat, ja dánlágan gávttiti oidnogohte jo diibmá.

– Mun ieš persovnnalaččat in liiko šealgájeaddjii gávttiide, muhto baicca árbevirolaš málle mielde gorrojuvvon gávttiide.

Huuva muitala maiddái ahte lea alcces gorron ruoná geassegávtti ja lea jo álgán goarrut nuppi gávtti mas leat unna lieđđeminstaraččat. Son muitala ahte áigu coggat iežas goarrun ruoná gávtti vuosttaš beaivvi go Márkomeannu doalut álget ja jus geargá nuppiin gávttiin, de áigo dan coggat maŋit beaivve Márkomeannus.