NRK Meny
Normal

Lohpida sierralágán vásáhusa eaktodáhtolaččaide

Márkomeannu joatká diimmá menestusain, ja fállá eaktodáhtolaččaide sierra gohttensaji dán jagi festiválas. Dainna sávvet addit eaktodáhtolaš bargiide áibbas erenoamáš vásáhusa.

Eaktodáhtolačča Márkomeanus

EAKTODÁHTOLAČČA MÁRKOMEANUS: Almmá eaktodáhtolaš bargiid haga eat leat mahkkege, muitala nubbi festivála jođiheaddji Maliin Selvli.

Foto: Jonne Sikku / Márkomeannu

– Oaččuimet nu ollu rámi go leimmet ásahan eaktodáhtolaččaid gohttensaji diibmá ja dainna menestusain mii joatkit dan jagi maiddái, muitala festiválabuvttadeaddji Susanne Langstrand-Andersen mojunjálmmiid.

Eaktodahtolaččaid gohttensadji lea fálaldat buohkaide, geat barget eaktodáhtolažžan Márkomeanus, ja doppe lea vejolaš idjadit gárvves lávuin dahje ieš ceggestit tealtta. Gohttensajis lea maid sierra oktasašlanjat (lounge), ja lea guovdu festiválabáikki.

Dárbbašit 120 eaktodáhtolačča

Márkomeannu dárbbaša sullii 120 eaktodahtolaš bargi jus galget sáhttit lágidit festivála. Barggut maidda dárbbašit veahki leat feara makkárat, sáhtostallamis ja doapparsirremis gitta bileahttavuovdimii.

Malin Selvli, guhte lea nubbi festivála eaktodáhtolaččaid guovtti jođiheaddjis, ávžžuha olbmuid dieđihit beroštumiset dál jo. Erenoamáš gohttenfálaldaga son sávvá geasuhit eanet eaktodáhtolaččaid festivála bargin.

Susanne Langstrand-Andersen

OLU RÁMI OŽŽON: Eaktodáhtolaččaid gohttensadji lihkostuvai diibmá, dán jagi áigot joatkit menestusain, muitala festiválabuvttadeaddji Susanne Langstrand-Andersen.

Foto: Marius Langstrand-Andersen / Márkomeannu

– Almmá eaktodáhtolaš bargiid haga eat leat mahkkege. Festivála lágideapmi lea hirbmat hommá, ja ollu doaimmalaš gieđat ja oaivvit fertejit leat čoahkkanan jus galgá njuovžilit mannat, mojohallá Selvli.

Son ávžžuha buohkaid, geat árvvoštallet eaktodáhtolažžan bargat, deaddilit festivála ruovttusiidui ja ohcat eaktodáhtolažžan.

Ásahit 18-jagi ahkemeari festivála gohttensadjái

Ođas dán jagi Márkomeanus lea ahte ásahit 18-jagi ahkemeari festivála dábálaš gohttensadjái. Festiválabuvttadeaddji Langstrand-Andersen muitala iežaset máŋga jagi árvvoštallan rievdadit ahkemeari, ja dát lea maid okta lávki dan guvlui ahte festivála ráhkadit profeššuneallabun.

– Háliidit ahte buohkat dovdet iežaset oadjebassan festiválas, ja dat lea mearrádus maid mii Márkomeanus leat mearridan ovttasrađiid politiijaiguin. Midjiide lea dehálaš ahte buohkat vásihit Márkomeanu heivvolaš ja hávskes festiválan. Festivála lea maŋemus jagiid sturron, ja nu lea maiddái mis stuorát dárbu dárkkistit ahte vuolleahkásaččat eai juga alkohola, muitala Susanne Langstrand-Andersen.

Ii jáhke dat lea mihkkege mii hirpmahuhttá gussiid, ja son ávžžuha buohkaid vuollel 18 jagi dieđihit iežaset eaktodáhtolažžan dahje idjadit veahkagohttensajis.

– 18-jagi ahkemearri festivála gohttensajis lea hui dábálaš eanaš gohttenfestiválain, ja ii galgga goit leat amas ortnet. Jus leat vuollel 18 jagi, de sáhtát dieđihit iežat eaktodáhtolažžan ja idjadit eaktodáhtolaččaid gohttensajis, dahje idjadit veahkagohttensajis, loahpaha festiválabuvttadeaddji.

Márkomeannu lea suoidnemanu 28.-31.b. Gállogiettis Evenášši suohkanis.