– Lea dehálaš jurddašit veahá eará láhkai go earát musihkkasuorggis. Mii háliidit ahte ii galgga leat dušše musihkka mii gullo ja oidno konsearttas. Lea somá geavahit veahá eará gaskaomiid, muitala Felgen Orkestera almmái Morten Ailu Hansen.

Guhkesbearjadaga lea sis konsearta Báktehárjjis, ja dalle sii dollet stuorra šovva. Diibmá lei sis konsearta Kárášjogas beassážiid, dalle ledje sis maid lávdegaskaoamit.

– Mii gulaimet maŋŋá go doalaimet šovva Kárášjogas diibmá, ahte dat lei hirbmat buorre, muhto dán jagi galgá šaddat vel buorebun!

– Mis galget leat dolat lávddis, ja dakkár lávdegaskaoamit maid AC/DC, Rolling Stones ja Justin Bieber geavahit – Ja dasa lassin vel Felgen Orkester!

Buot ruđaid geavahan

Sii geavahit dása buot dietnasa maid ožžot dien beaivvi Guovdageainnus, muhto ii daga maidege, go sin mielas šaddá somá addit geahččiide erenoamáš vásáhusa.

• Guldal maid: Radiokonsearta Felgen Orkesteriin

– Várra mii vuoitit veahá das boahtteáiggis, vaikko dal de dál geavaheažžatge olu resurssaid dása. Soitet boahtit vel eanet olbmot min boahttevaš konsearttaide.

Hansen muitala ahte sii háliidit oažžut dakkár gova, ahte sii leat veahá earáláganat go eará musihkkajoavkkut Sámis.

Viežžan ámmátteknihkkára

Dása dárbbašuvvo albma teknihkkár, ja sii leat viežžan su Mátta-Norggas. Son lea jo bargan stuorra máilmmi beakkániiguin, namuhan dás Avicii, Justin Bieber ja David Guetta. Ja go teknihkkár boahtá sidjiide veahkkin, de ii daga maidige vaikko vel beakkálmas Isac Elliot leage maid čuojaheamen doppe.

– Mun háleštin pyro-tehknihkkáriin ja muitalin sutnje ahte Isac Elliot maid boahtá. Son logai ahte go min musihkka ja su lávddegaskaoamit bohtet oktii, de šaddá guovtte geardde buoret šovva go Elliotas!
– Muhto dieđusge lea Isac Elliot hirbmat čeahppi, ja šaddá gal váttis dahkat seammá buori konseartta go son. Muhto mii gal bargat nu bures go sáhttit, ja mii galgat ráhkadit buoremus konseartta mii mis goassege lea leamaš.

– Go dii lehpet jo bargan nugo máilmmi beakkálmasat, ja sii han lávejit maid dánsut lávddis, goas bat Felgen Orkester dahká dan?
– Mii leat gal geahččalan dánsut veahá hárjehaladettiin, muhto lávddis ii oro gal dat dáhpáhuvvamin vuos gal, reašká Hansen.