«Mis leat nu stuora miesit ahte dárbbašuvvojit 3 olbmo go gálga merket». Nie rámpo Ásllat go muitala iežas bohccuid birra. Ja man nu sivas leat sámirádio guldaleaddjit liikostan Ásllagii.
Prográmmadahkki Ronald Isaksen Pulk muitala ahte prográmma lea ožžon ollu beroštumi maŋŋel go Áslat gullogođii «Namaheapmi» guoimmuhan sáddagis.
– Oainnán Facebookas movt olbmot juogadit dan sáddaga liŋka mas Ásllat gullo. Ja oainnán olbmot rešket go Ásllat rámpo iežas bohccuid ja vel iežas ge.
– Áslagis lea juoga mii deaivá olbmuid, son orro olaheame sihke nuorra ja rávisolbmuid, dadjá Pulk.
Pulk lea ráhkadan olu guoimmuhan sáddagiid rádios, nugo "Viimmat bearjadat" sáddagiid ovttas Ole Rune Hættain. Ja son muitala ahte lea hárve go okta karaktera oažžu nie stuora fuomášumi.
– Juohkehaččas lea iežas jiellat, muhto Ásllat orru dakkár geasa buohkat liikojit.
– Guokte nissonolbmo jearaiga mus ahte lea go Áslat singel, ahte galgen sus jearrat dan boahtte háve, reašká prográmmajođiheaddji.
Pulk lohpida ahte Áslat gullo juohke bearjadaga geasi rádjai.
– Jua, mus lea buorre gulahallan Ásllagiin, son áigu leat olahan muttos bearjadagaid.
– Odne mii gullat go Ásllat lea áidestoalppuid čuollame. Ja diehttelasat ribaha son veaháš rámpot, reaškkiha Ronald Isaksen Pulk.
> Guldal «Namaheapmi» prográmma dás diibmu 16.30: