NRK Meny
Normal

Kristtorn

Vuordináigeráidu: Juovlamánu 7. beaivi.

Kristtorn
Foto: Hansen, Helge / SCANPIX

Dán jagáš vuordináiggeráiddu lea Beate Heide buvttadan NRK Sámi ovddas.

Vuordináigeráidu: Juovlamánu 7. beaivi.

Soames iđida oidnen čáppa gova Facebookas. Lei Janne, mu rássečeahpes ustit, guhtes lei ilbmuhan gova. Govas lei kristtorn-oaksi su gilvvagárddis. Kristtorn ii birge nu álkit dáppe min luhtte nuorttan, muhto Janne liiko fievrridit amas rásiid gilvvagárdái ja de oaidnit jogo nagoda ealáskahttit daid. Dan dihte sus lei dál miestta dan áloruonas šattus. Moatti váhku das ovdal son lei čuohppan oavssi eret ja bidjan dan čáhcelásii huotnaha sinne.

Beate Heide
Foto: Privat

Maid son dál vuosehii, gasku juovlamánu, lei ahte oaksái ledje šaddan hearvarásit. Smávva, čáppa, vilges healbmelásttat ruonáviskes siskkožiin. Son ii lean goassege oaidnán hearvarásiid kristtornšattus ovdal, go geassi nuorttan lea illá oatni kristtornii lieđđut. Son oaččohii hearvarásiid dasa go «villii» luonddu ja doalvvui oavssi sisa lieggasii. Su mielas dat lei nu somá ahte háliidii juohkit iežas unna árgabeaiilu nuppiiguin. Ja mon illudin ovttas Janniin. Aivveval hutkás olbmot máhttet hutkat nu jierbmadit. Mon illudin golmma geardde: álggus go lei hutkan viežžat oavssi sisa iežas illudeažži. De illudin go lei nu čáppa govva čáppa rásis. Ja maŋemussii go Janne lei gillen almmuhit gova ja juohkit dan muinna ja olu iežá olbmuiguin.

Janne lea nu ládje utnolaš. Son lea ilu gáldu go lea nu áŋgir govvenapparáhtainis ja vuoseha nuppiide visot daid čáppa diŋggaid maid oaidná go lea olgun. Dat ii leat gal unnán, máhtán muitalit. Son lea akta dain árvvas olbmuin geat juhket govaid ja vásáhusaid. Nu mii nuppit beassat ealvit buori vásáhusaid suinna.