NRK Meny
Normal

Ásahedje fitnodaga, dál vuovdigohtet njuovvanreŋkkuid

Čájehan dihte velleda son guovtti báni ala maid geaigájit dego gáffaltruckas, loktejuvvo ja gomihuvvo reŋkkui.

En ungdomsbedrift i fra Karasjok lager slaktebenker

Vuosttaš jagi oahppit teknihkka ja industriijabuvttadeami suorggis Kárášjoga joatkkaskuvllas leat ráhkadan njuovvanreŋkko, maid ieža leat hutkan.

Njuovvanreŋkko fuobmájedje maŋŋel go bođii fáláldat álggahit nuoraidfitnodaga. Jurdagat jorragohte maid de galggašedje ráhkadit. Oktajienalaččat de mearridedje luohkás njuovvanreŋkkuid ráhkadišgoahtit.

Álkidit njuovvamiid

– Jurdda reŋkkuin lea geahpidit njuovvamiid. Bohccogorut bissu ráinnasiin, ja lea maid álkit čuožžut njuovvat, ii dárbbat guoggut, čilge Ailo Aslaksen Kemi.

Nuorat leat ovtta reŋkko ráhkadan, ja das sii leat dál oaidnán movt sáhttet rievdadit ja buoridit reŋkko.

Nils Samuel Anti

JOĐIHEADDJI: Reŋko UB beaivválaš jođiheaddji, Nils Samuel Anti.

Foto: Ánne Kátjá Nilsdatter Gaup

Fitnodaga Reŋko UB beaivválaš jođiheaddji, Nils Samuel Anti dat lea konstrueren reŋkko. Vuos sárgo ovttas tevnnega ahte makkár reŋko galggášii šaddat, ja de mihtidišgohte man alla reŋko šattášii vuogas.

Njuovvanreŋkkos lea liigerusttet, ja dán leat sii ráhkadan vai lea álkit oažžut bohccogoruda reŋkko ala. Nils Samuel muitala ahte dán liigerusttega leat maid ieža hutkan.

Lokte goroda reŋkui

Sii eai leat geahččalan bohccogoruda reŋkko ala bidjat vel, muhto ieža geahččaladdan movt doaibmá.

Nils Samuel Anti ja Tor Emil Hansen

NÁ LOKTE: Nils Samuel Anti ja Tor Emil Hansen čájeheaba movt reŋko doaibmá.

Foto: Ánne Kátjá Nilsdatter Gaup / NRK

Nu velleda Tor Emil Hansen rusttega ala čájehit ja Nils Samuel lokte su reŋkko ala liigerusttegiiin.

Vejolaš diŋgot reŋkko

Ailo Aslaksen Kemi, geas lea ovddasvástadus márkanfievrridit fitnodaga, muitala iežaset facebookai ráhkadan fitnodatsiiddu.

Ailo Aslaksen Kemi

GÁVPEALMMÁI: Ailo Aslaksen Kemii galgá vuovdalit Reŋku UB gálvvu olbmuide.

Foto: Ánne Kátjá Nilsdatter Gaup / NRK

Doppe de gulahallet olbmuiguin. Dasa lassiin leat sii duodjemárkaniin leamaš čájeheame reŋkko.

– Olbmot fitnet maid dáppe min luhtte, ja de sii oidnet ge makkár reŋkko lea, ja besset hupmat miiguin, muitala Kemi.

– Lea vejolaš diŋgot reŋkko iežas dárbbu mielde. Mii ráhkadit dakkára maid olbmot diŋgojit, čilgeba Nils Samuel ja Ailo. Muhttinat háliidit ovdamearkkadihte geahppasit reŋkko.

Ohppet movt fitnodat doaibmá

Oahpaheaddji Olav Sara Nikkinen muitala ahte nuoraidfitnodat doaibmá bures.

– Orru hui miellagiddevaš movttiidahttit nuoraid dákkár fitnodaga bidjat johtui. Dan láhkai ohppet maiddái movt fitnodat galgá doaibmat, lohká son.

Olav Sara Nikkinen

DUHTAVAŠ: Oahpaheaddji Olav Sara Nikkinen lohká buorrin go nuorat ohppet fitnadaga cegget.

Foto: Ánne Kátjá Nilsdatter Gaup / NRK

Vejolašvuohta joatkit fitnodagain

Fitnodat maid nuorat leat álggahan, loahpahuvvo boahtte jagi miessemánu loahpas. Nuorain lea vejolašvuohta joatkit fitnodagain maŋŋel skuvlajagi, dan dihte go reŋkkos ii leat pateanta váldon. Dalle fertejit fitnodaga registreret ođđasit, ja ieža jođihit dan.