NRK Meny
Normal

Sigára

Vuordináigeráidu: Juovlamánu 9. beaivi.

Eldre dame med sigar

Illustrasjonbilde

Foto: Colourbox

Dán jagáš vuordináiggeráiddu lea Beate Heide buvttadan NRK Sámi ovddas

Vuordináigeráidu: Juovlamánu 9. beaivi.

Øystein láve sigára oastit juovllaide. Son vállje guhkes sigára, ja jurdila ahte dán galgá návddašit.

Danne lea measta bassi boddu go čohkkeda juovlasigára borggoheažži. Dalle son ii daga ieža. Beare borgguha. Dan dahká gitta sigára lea nohkkan, vaikko man guhká ádjána.

Son čohkkeda buoragit stovlii, ráhkkana ráfálaš boddui ja čahkkeha sigára visot buriid neavvagiid mielde. Galgá sihke njuskojuvvot ja hiebahuvvot. Go sigára lea čahkkehuvvon, son vuodju stovlii ja čohkke jurdagiid dan áidna diŋgii: borgguhit juovlasigára.

Beate Heide
Foto: Privat

Latnja devdo sigárahájain. Haksojit máistagat ja suovva, áibbas earenoamáš suovvahádja. Amas guovllu hájat seaguhuvvojit viesu hájaide, juovlamuorrahádjii, spiidneerttethádjii, gintal- ja suovvasiidhájaide. Njozet son deavdá geahppáid, ja seamma njozet vuoigŋá olggos. Assás suovvarieggát loktanit gáhttui, birastahttet su ja jávket. Son vuoiŋŋasta, njammá ja borgguha. Minuhtat mannet. Holu lea hain báhcan sigáras. Holu illu.

Do son čohkká, Øystein, stovllas ja ii daga maidege ieža go dan áidna. Son borgguha sigára. Lea doppe, ja ii makkárge ieža sajis. Dovdá goktes rumaš váldá vuostá sigára. Vuoiŋŋasta ja hávskkohallá. Dát lea su boddu. Su juovlasigáraboddu. Nu unna bottoš, ja dan dihte galgá vuđolaččat návddašuvvot

Øystein diehtá buoragit ahte duhpát ii leat buorre dearvvašvuhtii. Son liikka vállje borgguhit sigára, nu go lea čađat dahkan. Nu go su áhčči dagai ovdal su, ja nu go muittii boaresáhčči dagai. Sigára hádja buktá govaid vássán juovllain, main lei oahppan goktes galggai leahkit: sigára galggai borgguhuvvot, beare dat ja áibbas jaska.

Son dovdá ahte lea buorre ahte borgguheapmi ádjána. Son ii leat válmmas boahtte bargui. Su jurdilat eai leat gonnege, beare iežas sinne. Son. Son ja sigára.