NRK Meny
Normal

Muoraiguin dolasteamin

Vuordináigeráidu: Juovlamánu 14. beaivi.

Bål

Illustrasjonsfoto

Foto: Máijá Holm Balto / NRK

Dán jagáš vuordináiggeráiddu lea Beate Heide buvttadan NRK Sámi ovddas

Vuordináigeráidu: Juovlamánu 14. beaivi.

Mon goalun dávjá, lean albma galbmačuoika, dasa gal mieđihan. Liikon ahte stobus lea buorre ja liekkas. Ii gal dego sávnnjis, muhto juobe badjel 20 lieggaceahki. Buoremus liekkas ii boađe el-rávnnjis, muhto muorraommanis ja dan hávskes spoahkkimis buolli muorain. Dainna lea man nu midja dovdo nu hávski ja gulul. Vai ommanii galgá dolla šaddat, dárbbaša man nu mainna dolasta. Muoraid čuollat lea dávjá dievdoolbmuid bargu. Sis lea bargu olles jagi geat liikojit dainna vitnahuššat. Muorat galget čullot ja sahejuvvot, dolvojuvvot dállui, bordojuvvot, goikaduvvot ja smávvejuvvot. Smáhkkomuorat ja beassit galget sestot čahkkeheapmái, muorat galget guđđojuvvot sisa ja gunat olggos. Agálaš bargu midjas dagaha roamšegieđaid ja sillui ráfi. Diekkár bargu lea daidda geain nu lihkku ahte vuovddi eaiggáduššet. Mii nuppit vertett oastit válmmas muoraseahkaid.

Beate Heide

Beate Heide

Foto: Privat

Mu jurdagat mannet boareseadnái. Son orui Haugnesas, ja doppe lei unnan vuovdi. Son dolastii darffiin ja čadaiguin. Dasa lassin manai viervái gunaiguin juohke nuppi iđeda. Ruoktut guttii álo soames viellobinnáid mat ledje gáddái rievdan. Boareseadni Sofie máhtii duhtat dainna maid oaččui. Omman lei sus váldogáldu lieggasii. Dan dihte son árrat badjánii ja dolastii, ja de morihii go gievkkan liegganii ja káffečáhci duolddai. Diet lei gal iežá eallin!

Mon lean ilus go beasan oastit muoraid maid borddestan ja guottán sisa. Loavttán áiggi dolastemiin, smáhkkomuoraiguin, gunaiguin ja dan liekkus lieggasiin maid dolasteapmi addá.