NRK Meny
Normal

Ida Emilie (13): – Jazz-dánsun lea buoremus maid dieđán

Ida Emilie Lindseth dánsu freestyle disco jazz. Geahča video mas oainnát Ida Emilie gilvvohallame.

Filmmážat Ida Emilies go gilvvohallá

GILVVOHALLAME: Ida Emilie áhčči, Daniel Lindseth lea filbmen DOTY nammasaš gilvvuin, ja lea suovvan NRK čájehit filmmažiid.

Golbmanuppelot jahkásaš, gii orru Strømmenis Lulli Norggas, muitala ahte eai leat nu ollusat geat dihtet dán dánsunvuogi birra mas lea ollu njuikun ja leahttu.

– Dát dánsun lean "mun". Dasa lassiin lea hui somá, eai ge leat nu ollusat geat dánsot dán, nu ahte lea dego veahá earálagan, dadjá ieš.

Alla dásis

Son dánsugođii viđa jahkásažžan, muhto easka diibmá váldigođii dánsuma duođas.

Vahkkoloahpa ovdal go deaivvadat Ida Emiliein, de gilvvohalái son DOTY nammasaš gilvvuin. Ii lean áibbas duhtávaš go ii vuoitán gilvvuid, muhto lohká mannan oalle bures goit ge. Dasa lassiin bávččagahttii juolggi gilvvuin, mii dagahii ahte ii sáhttán albmaládje dánsut.

Dánsumis leat vihttá dási. Dásit muitalit man čeahppi lea dánsut. Go fidne čuoggáid gilvvohallámiin, de beassá bajit dássái. Son dánsu guovtti dánsunlihtu ovddas, Norges Danseforbund ja Norges Danselærerforbund. Nuppi lihtus lea njealját dásis, nuppis gis viđat dásis.

Vuoitit máilmmi stuorámus gilvvuid

– Maid hálidat olahit dánsumin?

- Hálidan vuoitit "Disco kid" gilvvuid Englánddas. Jus dán vuoita, de sáhttá gohčodit iežas legenden, dadjá Ida Emilie.

  • Disco kid gilvvut leat máilmmi stuorámus freestyle gilvvut mat lágiduvvojit juohke jagi Englánddas juovlamánus. Ida Emilie galggai gilvvohallát doppe, muhto mearridi ahte ii vuolgge go lea áitto leamaš Englánddas gilvvohalláme muhttin eará gilvvuin.

Dehálaš hárjehallat riekta
Ida Emilie Lindseth

MOVTTET: Vaikko Ida Emilie moadde beaivvi ovdal lei bávččagahttán juolggi gilvvuin, de lei movttet go deaivvaimet su.

Foto: Tanja Norbye / NRK

Ida Emilie hárjehallá sullii 15 diimmu vahkkui, ja gilvvohallá gukttii golbmii mánnui. Hárjehallat riekta lea dehálaš jus áiggoš šaddat nu buorren go vejolaš, dadjá son.

– Ii leat ávki juohke beaivvi hárjehallát jus ii daga dan albmaládje. De lea buoret muhttin beivviid vuoiŋŋastit vai sáhttá addit visot go de hárjehallá.

Son hárjehallá sihke givrodaga, sávrodaga ja vanahallama lassin dánsumii.

Somá go nieida dánsu

Ida Emilie áhčči Daniel Lindseth bidjá ollu áiggi nieddas dánsumii. Son lea viššal mieđuštit nieiddas gilvvohallámiidda. Lindseth lea maid mielde dánsajoavkku stivrras. Su mielas lea miellagiddevaš čuovvut nieidda.

– Lea hui somá geahččat. Dan maid oainnán lea ahte Ida Emilie liiko nu bures dánsut. Álo go beassá dánsut, ja lea gilvvohallán, de leat hirbmat mojit, dadjá Daniel Lindseth.

Dánsun lea oalle divrras. Biktasat ja gilvvohallamat mákset. Maiddái hárjehallamat ja priváhtadiimmut oahpaheddjái. In duostta šat rehkenasttit olu máksá.

Daniel Lindseth, áhčči