NRK Meny
Normal

Geavat sámegiela sosiála mediain!

Leago dus heajos oamedovdu go joavdelasttát Facebookas? Máret Láillás lea dutnje ávžžuhus.

Facebook
Foto: AP

Sosiála mediat váldet olu áiggi, dat ii leat čiegus ášši. Leaš dal snuoggat makkár doaimmat skihpáriin leat dahje čuovvut muhttun riiddu luovusbeatnagiid birra.

Mii geavahat sosiála mediaid iešguđetge láhkai. Muhtumat čuvvot dušše mielde das maid earát dahket, earát ges rábmojit man čeahpit sii leat leamaš hárjehallat. Soapmasat ges geavahit sosiála mediaid vai besset váidalit man nu ášši birra. Muhto ii go livčče áigi seailluhit gollegiela sosiála media vehkiin?

Maret Laila Anti

Máret Láilá Anti ávžžuha min geavahit sámegiela sosiála mediain.

Foto: PRIVAT FOTO

– Juogat gielladáidduid earáiguin! Jus leaš heajos oamedovdu go joavdelasttát Facebookas, de čális sámegillii.

Don it oba dieđege man ávkin dat soaitá easkaálgiide, nuoraide ja nu ain. Jus dus vel rikkis giella, de orru measta vearredahku jus it juogat valljodagat earáiguin, čállá Máret Láilá Anti Facebookii.

> Loga eanet NuFal-áššiid dás

Čalmmustahttit giela

Máret Láilá Anti ávžžuha min geavahit sosiála mediaid buori áššái. Giella seailluheapmái. Jurdda buollái das go Anti lei ieš fitnan skihpáriid luhtte geain lea hui rikkes ja buorre giella.

– Mun ohppen ieš máŋga sáni daid olbmuid luhtte, ja de mun smihtten ahte nie han galggašii mis sámegiellagiin. Ahte mii juogadat iežamet gielladáidduid.
– Sosiála mediat leat dien dáfus hui buorit. Jus don čálát sámegillii de sáhttá muhttun eará olmmoš oahppat sáni, dahje jus ii máhte nu bures čállit, de dat oaidná mo dat čállojuvvo.

Máret Láilá oaidná dan hui dehálažžan ahte sámegiella lea oidnosis sosiála mediain.

– Mii čájehat ahte sámegiella lea maid giella mainna sáhttá gulahallat sosiála mediain. Ja dat maid lokte sámegiela árvvu.

> Loga maid: Sámegiella oidno unnán neahtas

> Loga maid: Movt čállá BRB ja LOL sámegillii?

Jus dat ii čalmmustahttojuvvo, de son ballá giela boahtteáiggis.

– Sosiála mediat leat nu dehálaš gulahallanbáikkit.
– Mun veahá balan ahte jus mii eat geavat sámegiela sosiála mediain, de sáhttá sámegiela dilli vel eambbo raššut go dál lea.

Anti joatká.

Mii geavahat sosiála mediaid nu olu ja mii gulahallat maid nu olu doppe. Dađi bahát orru dan láhkai ahte doppe sámegiella lea vuoittáhallan.

Guldal vel dá go Máret Láilá Anti lei guossin Dáppe Dál sáddagis:

Giellapolitiija

Máret Láilá Anti jáhkká ahte olbmot soitet ballat dan nu gohččoduvvon giellapolitiijas.

– Mii fertet vuos muitit dan ahte leat hirbmat olu sápmelaččat geat eai leat goassige oahppan čállit sámegillii. Dasa lassin vel leat sii geat leat oahppan, muhto soitet dušše muhtin muddui oahppan.

Ávžžuha eanet čállit sámegillii sosiála mediain
Foto: Anja Sofie Hansen / NRK

– Nu ahte mun jáhkán hui olusiin lea dat ballu ahte sin čállingiella ii leat doarvái buorre. Ja jus dalle vel muhttun álgá cuiggodit sin, de dat gal sáhttá gavdnjet olbmuid čállimis sámegillii sosiála mediain.

> Loga maid: – Sámegiella lea buoremus ráppengiella

Máret Láillás lea vel muittuhus giellapolitiijaide.

– Mun háliidan beare muittuhit dan ahte dat leat hui olusat geat eai máhte čállit sámegillii.

Jus mii galgat gáržžidit dien láhkai, ahte dušše dat geat máhttet 100 proseantta riekta čállit galget beassat čállit sosiála mediain, na dalle eai báze nu gallis geat sáhttet čállit sámegillii.

Váikko balatge giellapolitiijas, de Anti ávžžuha du lihkáge čállit sámegillii.
– Ja daidda geat ballet giellapolitiijas, de mun ferten dán láhkai dadjat ahte don fertet ieš vihkkedallat mii lea deháleamos: ahte sámegiella oidno dahje ahte dat ii oidno obanassiige?

Nu ahte mun gal ávžžuhan, vaikke iežat mielas it máhte, de don lihkká čálát. Dat sáhttá leat ávkin geasa nu ja don leat maid mielde čalmmustahttimin giela.