– Mun geavahan twittera iežan “mikrubloggan” . Muhtomin mun háliidan ahte buohkat Norggas galget áddet , ja dalle gal čálán maiddái dárogillii, lohká Helge Aslaksen Ravna.
Helge Aslaksen Ravdna lea viššal geavahit twitterá, ja doppe son dávjá čállá sámegillii. Ovddit čavčča son álggii oahpahit (vai ieš oahppat?) lullisámegiella. Dan rájes gal lea geavahan dan eanet ahte eanet. Dál de čállá twitterii sihke dárogillii, davvesámegillii ja lullisámegillii.
- Loga maid: Áŋgirat civkit sámegillii
– Lea hui álki geavahit twitter. Dan fuobmájin go čállen blogga lullisámegillii. Lei váttis go doppe galgá nu ollu čállit. Dál čálán twitterii go lea ollu álkit čállit oanehis cealkagiid, lohká Ravna.
–Geavahat go Twitter oahppansadjin maid?
– Dieđusge! Dat lea dego mu duhkoraddanšillju. Doppe beasan geahččaladdat ja hárjánit čállit. Doppe leat eatnasat giellačeahpit. Nu ahte mun láven dávjá jearrat veahki earáin, ja digaštallat singuin giellaáššiid, lohká Ravna.
Dehálaš geavahit giela
Son muitala maid ahte olbmuide lea dábáleamos čállit dárogillii. Go mii geavahit neahta, de lea várra álkit geavahit dárogiela.
– Sosiála mediat leat diekkár “ođđa” mediat, ja olbmot eai leat vel nu hárjánan doppe geavahit sámegiela. Mu mielas mii fertet vuoitit dan saji, nu ahte mii sáhttit geavahit sámegiela doppe maid, lohká Ravna.
Gilvalit
Neahttasiiddus Indigenoustweets.com lea almmuhuvvon listu mas oaidná geat dávjjimusat “civket” sámegillii, dahje eará álgoálbmotgielaide Twitteris. Doppe sáhttá oaidnit ahte leat 135 olbmo geat leat čállán oktiibuot badjel 24.000 civkkanasa sámegillii.
Dat gii dávjjimusat “civká” sámegillii, lea YLE Sápmi. Lagabui 70% sin civkkanasain leat sámegillii.
– Lea gal hirbmat somá go lea boahtán diekkár listtu, go de han sáhttá veahá gilvalit. In gilvvu dihte gal čále sámegillii, muhto livččii gal somá geahččalit beassat veahá badjelii dan listtus, lohká Ravna.
Čális sámegillii!
Helge Aslaksen Ravna gal ii leat go 21. sajis davvesámegiela listtus, ja 8. sajis lullisámegiela listtus. Dássážii lea son čállán 272 “civkalusa” davvesámegillii ja 80 ges lullisámegillii. Son ávžžuha earáid nai “civkigoahtit” sámegillii. Vaikko ii soaitte leat hirbmat čeahppi čállit sámegillii.
– Twitter lea hirbmat buorre sadji gos álgá čállit sámegillii. Sáhtát čállit vaikko maid ja duhkoraddat sániiguin. Mun gal in láve čállit nu ollu iežan eallima birra, muhto maid mun doaivvun ja somás áššiid. Geavat fal sámegiella Twitteris ja eará neahttasiidduin, lea Ravna ávžžuhus earáide.
