– Leat hui olusat, geat eai váldde oktavuođa midjiide, erenomážit gánddat, lohká Randi Olsen, guhte lea Romssa Tvibit nuoraidviesu dearvvašvuođadivššár.
Vaikko dutkamušat čájehitge ahte leat nieiddat, geat rahčet eanemusat psyhkalaččat, de lohket maid Romssa gávpoga gánddat ahte sii rahčet. Sii dovdet ahte fertejit leat perfeakta. Sis galget leat divraseamos biktasat, rivttes vuoktahápmi ja fiinna gorut.
Dearvvasvuođadivššár Randi Olsen sávvá ahte maiddái gánddat váldet oktavuođa go dárbbašit hállat.
- Guldal maid: Margrethe Bals muitala mii lossamiella lea
– Mun jáhkán ahte lea nu ahte gánddain vurdet ahte birgejit veahki haga. Muhto dat váttisvuođat, mat gávdnojit dán áigge leat sihke gánddain ja nieiddain. Lea olu vuordámušat sihke gánddaide ja nieiddaide, muhto jáhkán ahte nieiddat leat čeahpibut hállat daid birra. Ja danin lea várra álkit sidjiide veahki jearrat, lohká Olsen.
Buohtastahttet iežaset beakkán olbmuiguin
Romssa nuorat, geat leat háleštan NRK:in, lohket ahte dálá nuorat fertet buohtastahttit iežaset beakkán olbmuiguin, geat orrot leamen perfeaktat. Ja dan maid eai oainne lea dan stuorra apparáhta, mii lea beakkániid duohken, ja geat barget dušše dainna ahte daid dahkat perfeaktan.
- Loga maid: Folk snikfotograferes på gata og henges ut på Instagram
- Loga maid: Ministeren fikk tusen tips mot nettmobbing
Olsen jáhkká ahte nuorat ballet ahte eai leat perfeakta go jerret veahkki, ja danin eai daga dan.
Heajos beaivvit maid gávdojit
Nuorat galget leat čeahpit skuvllas, galget leat seakkit ja galget valáštallat, ja dasa lassin galget velá leat čábbát ja bivnnuhat.
– Dat lea olatmeahttun, lohká Olsen.
Son lohká maid ahte lea hui buorre go nuorat dovdet ahte dat lea veadjemeahttun. Lea dábálaš ahte buot beaivvit eai leat seammá buorit.
– Lea dehálaš diehtit ahte eallim ii leat álo seammá buorre, dan lea dehálaš oahpahit ja čilget nuoraide, lohká Olsen.
