NRK Meny
Normal

Deaivvadit dušše lávddi alde

YLVA joavku almmuha sin vuosttaš skearru.

YLVA pressebilde
Foto: Vesa Toppari

Mannán bearjadaga almmuhii YLVA nammasaš joavku iežaset vuosttaš skearru «YLVA». Sii čilgejit musihka leat elektrovnnalaš, mas luohti ja jazz trompehta leat elemeantan.

Joavkkus čuojahit Stefan Kvarnström, Antero Priha, Asko Keränen ja Niillas Holmberg.

YLVA erenomášvuohta lea ahte sii eai goassege deaivvat bargat, eará go konsearttas.

Niillas Holmberg čilge NRK:i ahte dá lea sin bargovuohki.

– Dat lei nu ahte mun in deaivan Stefan Kvarnström, gii buvttada lávlagiid, ovdal go lávlagat ledje buori muddui gárvánan.

«Performance»-joavku

Holmberg muitala maiddái ahte YLVA joavku jurddaha olu dan birra movt sii leat lávddi alde.

– Mii smiehttat makkár gárvvuid mii coggat ja makkár olgguldasgovva mii addit álbmogii.

Muhtumat soitet muitit go YLVA juogadii lávddi Suohpanterror-joavkkuin Márkomeannus diibmá.

Doppe lei sin cealkámuš: «Dathan gohčoduvvo turistaáigin. Manne mii eat oččoše bivdit daid?». Dán bihtás sii earret eará čuohpadedje gahpira.

– Mii čájeheimmet ahte goanstta sámi gahpirat ii leat dohkálaš ášši, čilge Holmberg.

Oažžut olbmuid lihkadit

Skearrus leat gávcci lávlaga, bealli dáin leat guhkibuš lávlagat. «Amsterdam», «Grande», «Bu Tofipijo» ja «Lipn» leat guhkit go 6 minuhta.

Muđui leat skearru guokte oaneheamos lávlaga, «Weeo» ja «Roryda», maiddái joavkku guokte vuosttaš singela.

«Roryda» lávlagii searvá Ailu Valle ráppain.

– Ailu lea čállán hirbmat fiinna sániid iežas ráppii, ja lávlla lea hirbmat buorre ovdamearka mo dán áiggi lea vejolaš buvttadit ráppá vokálaid, muitala Niillas Holmberg.

Holmberga konsearta vásáhusaid vuođul lea «Roryda» dat lávlla mii oažžu olbmuid lihkadit.

– Die lea dakkár lávlla mii bidjá álbmoga johtui ja julggiid lihkadit, loahpaha Holmberg.