NRK Meny
Normal

– Diehtojuohkimii lea ain stuorra dárbu

Ofelašdoaibma lea dál 10 jagi ávvudeamen. Ofelašdoaimma jođiheaddji lohká ahte lea ain dárbu bargat juohkit dieđuid sápmelaččaid birra.

Risten Länsman

Risten Länsman, jođiheaddji Ofelašdoaummas

Foto: Piera Balto / NRK

– Min váldoulbmil lea juohkit dieđuid sápmelaččaid birra skuvllaide miehtá Norgga. Leat unnán oahppagirjjit čállojuvvon sámi kultuvrra ja servodat birra, ja dat fas mielddisbuktá ahte oahpaheaddjit dávjá guđđet dahje guoskkahastet moadde sámi fáttá. Diehtojuohkimii lea ain stuorra dárbu, lohká Risten Länsman, guhte lea ofelašdoaimma jođiheaddji.

Ofelašdoaibma lea bissovaš doaibma, ja dán jagi lasihii ođasmahttindepartemeanta ovtta ofelačča. Ja dat mearkkaša ahte ofelašdoaibma olaha duppal geardde eanet oahppiid go duoid ovddit jagiid. Länsman mielas dát lea hui buorre.

Sámi historjjá muitalit

Okta dan njealji ofelaččas dán jagi lea Jon-Christer Mudenia. Sii leat dál leamašan Sámi Allaskuvllas Guovdageainnus gávcci vahku. Doppe sii ohppe dan maid galget ovdanbuktit go leat mátkkošteamen miehtá Norgga. Dál lea Jon-Christer lohkamin eksámenii, mii lea loahpas dán mánu.

Jon-Christer Mudenia

Jon-Christer Mudenia lea dán jagi Ofelaš

Foto: Piera Balto / NRK

– Mun gal jáhkán ahte šaddá duođaid somá. Mun illudan dál johtigoahtit fárrolaga eará ofelaččaiguin, ja muitalit iežamet kultuvrra birra. Illudan várra eanemusat gullat makkár gažaldagat oahppiin leat, lohká Mudenia.
Son illuda muitalit sámiid birra dážaide, vaikko váruha ahte dáidá baicce šaddat čilget daidda.

– Mun in jáhke nu máŋgasa diehtit dáruiduhttima birra, ja makkár váikkuhusat dan politihkas leat otná dan beaivve. Soitet leat hui olu ovdagáttut das vuolgán. Dat lea diekkár ášši maid ferte čilget daidda, danin go mis lea nu váttes historjá, lohká Mudenia.

Ovddeš ofelaš rávvagat

Mikkel Rasmus Logje, guhte lei ofelašdoaimmas 2011-2012, muitala ahte sáhttet boahtit dakkár gažaldagat, mat sápmelaččat mielas leat hui diehttelasat.

– Ii makkárge gažaldat leat jallas gažaldat, muitala Logje.

Su mielas lea dát hirbmat buorre doaibma, go oahpai hui olu. Su mielas lea Norga hui girjái, vaikko ii lea nu stuorra riika. Norgga joatkkaskuvlla oahppiide ii leat muitaluvvon nu olu sámiid birra, ja muitala ahte lea measta dego dát livččii sidjiide áibbas amas ášši.

Mikkel Rasmus Logje

Mikkel Rasmus Logje lei Ofelaš 2011/2012:as.

Foto: Piera Balto / NRK

– Danin lea dákkár doaibma nu buorre, dat dárbbašuvvo, lohká Logje.

Ávvudit

Otne leatge dálá ja ovddeš ofelaččat čoahkkanan Osloi ávvudit 10 jagi doaimma. Doaluide leat sihke stáhtaministtar ja eará politihkkárat searvan.

– Midjiide lea hirbmat stuorra gudni ahte Norgga stáhtaministtar ieš lea boahtán, danin go son ieš álggahii sámi ofelašdoaimma, lohká Länsman.

Mudenia muitala ahte šaddá gal hui somá deaivvadit stáhtaministariin, ja lea jurddašan mo de galgá láhttet go deaivvada suinna.

– Šattan sihkkarit veahá Starstruckan, lohká Mudenia.