NRK Meny
Normal

Belgiai vuolgán studeret

– Háliidan oahpásmuvvat eará kultuvrrain ja eará olbmuiguin, lohká Anne Marie.

Anne Marie Hætta i Belgia
Foto: Anne Marie Hætta / Privat

– Mus lea alo leamašan hui miella vuolgit mátkkoštit ja oaidnit máilbmi. Dál lei hui vuogas áigi, go mun lean juo studeremin. Dalle lei vejolašvuohta válljet eará skuvlla maŋemuš jagi, lohká Anne Marie Hætta (23).

Anne Marie lea Mázes eret, ja lea dál fárren Belgiai studeret. Son lea jo váldán guokte vuosttaš jagi Media ja Kommunikašuvdna Oslo Allaskuvllas.

Ii leat dušše fágalaš ákkaid dihte mun lean vuolgán Belgiai studeret, muhto maiddái oahpásmuvvat eará kultuvrrain ja eará olbmuiguin, lohká Hætta.

Dát lea vuosttaš geardi go son lea Belgias, ja áigu dál leat doppe njeallje mánu.

– Ovtta láhkai gal lea oalle issoras dušše vuolgit okto máilbmái mátkkoštit, ja orrut doppe guhkit áigi. Muhto lea maiddái hui suohtas vuolgit máilbmái vásihit ođđa diŋggaid. Olmmoš ii dieđe goassege mii ain dáhpáhuvvá. Illudan issorasat, lohká Hætta.

Máŋggas vulget olgoriikii

Su luohkás lei dievvasat, geat manne olgoriikii studeret dán lohkanbaji, ja sis ledje máŋga vejolašvuođa. Muhtumat su luohkás leat mannan New Yorkii, Hawaii, Hamburgii, Dánmárkui ja Amsterdamii.

– Álggus mun jurddašin Amsterdamii, muhto dohko ledje jo mannan golmmas min luohkás. Dalle ii lean sadji šat. Mu ráđđeaddi logai dalle ahte ledje aiddo šiehtadan Belgiain, ja dat geasuhii mu hirbmadit, lohká Hætta.

Katienberg campus, Artevelde allaskuvllas

Anne Marie skuvla, Katienberg campus, Artevelde allaskuvllas.

Foto: Anne Marie Hætta / Privat

Giella oahppat

Dan maid son eanemusat smiehttá dál, lea mo doppe gulahallat.

Doppe hállet hollánddagiela, ja lean gullan ahte lea okta dain váddáseamos gielain, maid oahppat. Muhto sávan dat manná bures, vaikko vel in máhtege dán giela dál, lohká Hætta.

Muhto buot oahpahus lea eaŋgalasgillii, nu ahte dan gal jáhkká ahte manná bures. Maŋemuš lohkanbaji lea sis maid leamašan buot oahpahus eaŋgalasgillii, go sis ledje dalle olgoriikka studeanttat.

– Nie mii beasaimet hárjehallat giela, dassážii go mii galggaimet vuolgit olgoriikii, lohká Hætta.

Ovtta guvlui bileahtta

Son lea dušše diggon girdinbileahtta ovtta guvlui, nu ahte ii dieđe goas boahtte háve boahtá ruoktot.
– In dieđe šattan go ruoktut juovllaide ja ođđajahkái. Muhto eadni gal lea lohpidan boahtit guossái, boagusta Hætta.