Diibmá vuoittahalai Signe bronšefinálas Eurohpá meašttirgivvuin, dán jagi son háliida beassat finálii.

– Mun háliidan olahit buoret bohtosa go diibmá, dat lea mu mihttu.

Boahtte mánus lágiduvvojit Eurohpá meašttirgilvvut Polenis. 2012 šattai Fidje Store Eurohpá meašttirin juste fal seamma sajis, gos dán jagáš gilvvut leat.

– In leat šaddan ráhkkanit nu bures dán jagi go leat nu olu eksámenat justa dál. Skuvla lea maid dehálaš.

Guldal dás maid Signe Marie Fidje Store muitala Eurohpá meašttirgilvvuid birra:

Hárjehallá riikajoavkku nieiddaiguin

Signe Marie vázzá maŋimuš jagi Norgga Toppidrett skuvlla Oslos, ja justa dán áigodagas leatge olu eksámenat skuvllain, muhto son hárjehallá gal go ain lea dilli.

– Dán vahkku hárjehalan ovttas riikajoavkku nieiddaiguin, muhto lihkká in dovdda ahte gearggan ráhkkanit doarvái bures.

Signe Marie gilvvohallá juniorluohkás, 63-kilosaš luohkás. Ja lea oktiibuot vuoitán 13 golli ja 5 silbba Norggameašttirgilvvuin lassin dan Eurohpá meašttirgilvvu gollái jagis 2012.

Háliidivččii beassat olimpijagilvvuide

– Maŋŋá Eurohpá meašttirgilvvuid ráhkkanišgoađán ges máilmmimeašttirgilvvuide, mat leat borgemánus, ja boahtte jagi áiggun geahččalit olahit nu buriid bohtosiid ahte beasan olympiagilvvuide jagi 2016, muitala Fidje Store.