NRK Meny
Normal

Ártet go eai bánte

Máret Sofe Turi (17) lea mannan Makedoniai oahppat mo mii sáhttit buorebut gáhttet luonddu.

Nuoraid-dálkkádatprošeakta «Wake up- take action»

10 beaivvi digaštallet nuorat Makedonia oaivegávpogis mo sáhttet ruonábut eallit ja mo sáhttet buorebut gáhttet luonddu.

Foto: Privat

Norgga, Duiskka, Espánia, Stuorra Britannia, Kroatia, Hellasa ja Makedonia nuorat deaivvadit dáid beivviid Makedonia oaivegávpogis.

Vihtta nuora ovddastit Norgga dán internašunála nuoraid-dálkkádatprošeavttas «Wake up- take action», okta dain lea guovdageainnulaš Máret Sofe Turi (17).

Mihttu lea digaštallat ja oahppat eambbo luonddu ja birasgáhttema birra.

– Muhtin jearai mus leago mus miella vuolgit mielde. Álggos in diehtán vuolggán go vai in, muhto de muitališgođii ahte lea luonddu ja luonddugáhttema birra ja maid mii sáhttit bargat.

Go muitalii vel ahte lea dálkkádatnuppástusad birra, dalle gal jo lohken «jo, mun lean mielde! Goas mii vuolgit?», muitala Turi.

Marit Sofie Turi

Vaikko Máret Sofe Turi lea dušše 17 jagi boaris, de son duođaid áŋgiruššá dálkkádatrievdanáššiiguin bargat.

Foto: Privat

Áŋgiruššá dálkkádatrievdanáššiiguin bargat

10 beaivvi digaštallet dát nuorat Makedonia oaivegávpogis mo sáhttet ruonábut eallit ja mo sáhttet buorebut gáhttet luonddu.

Vaikko Máret Sofe Turi lea dušše 17 jagi boaris, de son duođaid áŋgiruššá dálkkádatrievdanáššiiguin bargat.

– Dat lea hui áigeguovdilis ja dehálaš ášši ja mii sáhttit jo oaidnint buot daid váikkuhusaid.

– Mu mielas galggašedje, ain juo nuorat, diehtit eanet dan birra. Danin mun vulginge deike vai sáhtán muitalit Norgga nuoraide ja earáide dán birra.

Nuoraid-dálkkádatprošeakta «Wake up- take action»

Máret Sofe oktain joavkkuin leat jo moadde beaivve leamaš Makedonias ja lea olu oahppan.

Foto: Privat

Son lea bajásšaddan Guovdageainnus, sámi guovllus ja lea ieš sápmelaš. Nu son muitala ahte gullevašvuohta lea su movttiidahttán beroštit luonddus.

– Ovdamearkka dihtii ruvkedoaimmat, dat Nussir, Nordic Mining ja buot diet áššit. Dat lea juoga mas mun beroštan.

– Go lean deike vuolgán de mun beasan muitalit earáide mo Norggas leat dál ruvkedoaimmat eatnamiid billisteamen. Mun lean veaháš muitalan dan birra ja sii leat oalle láhkai suorganan go Norggas lea dákkár dilli.

Máret Sofe oktain joavkkuin leat jo moadde beaivve leamaš Makedonias ja lea olu oahppan. Earret eará man dehálaš lea bántet bohtalii.

– Mii leat oahppan ahte bántet bohtalii lea juoga mii lea hui dábálaš Norggas, muhto dat ii leat dábálaš eará riikain. Dat lea Norgga diŋga.

– Dat leage hui dehálaš bántet bohtaliidgo bohtalat leat ráhkaduvvon plastihkas ja plastihkka ádjána badjel 100 jagi suddan lundui, muitala son hirpmahuvvan jienain.

Nuoraid-dálkkádatprošeakta «Wake up- take action»

Máret Sofe oktain eará nuorain geat leat váldán oasi «Wake up- take action» dálkkádatprošeavttas.

Foto: Privat

Moatte beaivvis leat sii maiddái geargan galledit báikki olbmuid, geahččat mo sis lea dilli.

– Muhtin olbmuin leat gusat, vuoncát ja feara mat. Sii lohket ahte rievddadeaddji dálkkit dagahit sidjiide hui váttis dili. Eai dat leat dakkár dálkkit mat bistet, dat lea nu ahte ovtta beaivve lea hui fiinna dálki ja nuppi beaivve fas galbmaset dálki.

– Ii ná gal oro nu nu dehálaš ášši, muhto dat lea. Gusat eai bažš šat nu olu mielkki ja eallit eai birge bures.

Guldal olles jearahallama dás: