NRK Meny
Normal

Čiegusvuođas oahpai sámegiela

Eiseválddit rievidedje su váhnenbuolvvas eatnigiela, dál son lea giela váldimin ruovttoluotta.

Samer i Russland

Illustrašuvdnagovva mii čájeha sápmelaččaid Ruoššas.

Foto: Lovozero museum

Logi jagi dás ovdal fárrii murmanskalaš Olga Egorova (27) Kárášjohkii skuvlla vázzit. Ii son diehtán vuos dalle maid háliidiii, muhto oahpai dattetge sihke davvisámegiela, dárogiela ja muđui sámi kultuvrra birra.

– Mun lean sápmelaš ja mus lea álohii leamaš dovdu ahte mus váilu juoga, čilge son.
– Ja de fuomášin ahte giella lea hui dehálaš oassi kultuvrras, ja nu mun mearridin oahppat sámegiela.

Háliida oahppat gielddasámegiela

Olga Egorova leage bajásšaddan Ruoššabealsámis ja dilli sápmelaččain ii leat leamaš buorre doppe.

Olga Egorova

Olga Egorova (27) ii oahppan iežas eatnigiela ruoššaiduhttima geažil, dál son lea giela váldimin ruovttoluotta.

Foto: Privat

Eiseváldit rievidedje Egorova váhnenbuolvvas eatnigiela. Sutnje oahpahii áddjá ja áhkku moadde sáni sámegillii, muhto dat galggai dáhpáhuvvat čiegusvuođas. Go dat lei njulgestaga váralaš hállat sámegiela ja sámevuođa čájehit.

– Dat lei nu garra ruoššaiduhttin áigi ahte áhkku ja áddjá nu balaiga hupmat sámegiela mánáidguin. Eatni muitalii ahte son jáhkii ahte min sámegiella gal jávká.

Ruoššaiduhttima geažil ii oahppan Egorova eadni gielddasámegiela.

– Eadni imaštii juohke beaivve manne munnos oappáin lea nu stuorra beroštupmi sámi kultuvrii.

Egorova muittaša vel mo lei iežas áddjáin hállat sámegiela vuosttaš háve.
– Mun maid muittán go mun geahččaladdagohten sámástit áddjáin. Vuosttaš háve son geahčastii nu ártegit munnje, dego livččii jurdileamen "manne don dál sámástat?".

Mun jurddašin álggos ahte son lei vajáldahttán giela, muhto áiggi mielde son álggii sámástit munnje ja fuomášii ahte "oi, ii dat dattetge dáidde leat nu váralaš, muittaša Olga Egorova.

Loga eanet Olga Egorova birra dárogillii dás: Her vil de unge lære samisk

Guovdageainnus ii dárbbaš Olga Egorova čiegadit sámevuođas ja davvisámegiela son gal jo nu hállá. Muhto gielddasámegiela ii leat son vuos oahppan.

– Rievtti mielde mun galggašin oahppat gielddasámegiela. Mun álgen dan oahppat, muhto dat lei nu váttis go mis eai leat oahppofálaldagat dahjege kurssat Murmanskkas.
– Danne mun jurddašin ahte soaitá leat ávkin jus vuos oahpan eará sámegiela ja maŋŋá oahpan gielddasámegiela.

Nu son fárriige Finnmárkkui. Álggos orui Egorova Kárášjogas, muhto de mearridii ahte ferte Guovdageidnui fárret gazzat oahpu Sámi Allaskuvllas.

Dál go davvisámegiela máhttá, de son ádde eanet gielddasámegielas.

– Muhtomin mun oainnán sátneovttalágánvuođaid, ja dalle lea olu álkit muitit daid. Ja sojahanmálle maid, mun ádden olu eanet mo oahppat gielddasámegiela, mo mun galggan geavahit sániid ráhkadit cealkagiid, muitala Egorova. Guhte sávvá ahte gielddasámegielas lea čuvges boahtteáigi.

Guldal olles jearahallama dás: