NRK Meny
Normal

- Seamma dovddut hárjehallamis go ráhkisvuođas

Diet sánit gullet Anja Gravenii (36). Sus lea mihttu hárjehallat 30 beaivve, ja dat gal buktá sutnje movtta!

Anja Graven

Anja Graven Dønnevarre čohka alde hárjehaddamin

Foto: Anja Graven / Privat

Graven ii leat dušše iežas movttiidahttimin, son lea maid ráhkadan Facebook-joavkku gos geahččala earáid oažžut hárjehaddat.

Joavkkus leat sullii 30 miellahtu. Sii juhket sihke govaid ja hárjehaddet.

– Facebookas mii juogadit buot maid mii hárjehaddat, ja dat movttiidahttá sihke mu ja earáid.

Jus ovtta beaivvi ribaha láikošit ii ge hárjehala, de ii leat nu buorre dovdu.

– Šaddá maid nu ahte go ii hárjehatta, de šaddá heajos oamedovdu.

30 beaivásaš hástalus

Diibmá son hálidii hárjehaddat 100 beaivvi njuolgut.

Anja Graven hárjehaddamin

Dálvet ferte muhtimin siste hárjehaddat

Foto: Anja Graven / Privat

Dán jagi lea vehá unnidan hástalusa, muhto jurdda lea ain seamma. [Anja Graven hárjehaddamin]

– Mus lea dat mihttu ahte mun galggan leat buoret vuoimmis.

Ii leat beare rumaš mii gievru, muhto maid mokta buorrána.

– Go mun hárjehattan, de loktana mus sihke mokta ja energiija. Lea álkit maid lihkkat iđđes ja eallinkvalitehta lea mu mielas buorránan maŋŋá go álgen hárjehaddat.

Skábman hárjehaddat

Máŋgasis sáhttá leat lossa miella skábman. Dat maid váikkuha hárjehaddamii dan geažil go mokta šaddá losit.

Gravena ráva gal lea beare bágget iežat hárjehaddat vaikko man unnán miella de leaš.

– Motivašuvdna ii boađe iešalddis. Go beasat vuos johtui, de gal manná njuovžileappot.

Go leat johtui beassan, de orru leamen measta nu ahte ii mihkkege bisset du.

Nu go namuhuvvon, de hárjehattai son 100 beaivvi njuolgut, vaikko gearggai dainna čuđiin beivviin de ain jotkkii.

– Mus lea doaibman bures dát hástalus. Go ledjen geargan dainna 100:in beivviin de jotken ain árgabeivviid hárjehaddat.

Hárjehallanrávvagat

Diimmá ja dán jagi guhkit áiggi hárjehaddanhástalusaid geažil lea son veahá buorebut oahpásnuvvan iežas rupmašiin ja movt dat doaibmá go hárjehaddá.

– Ii juohke diŋga heive buohkaide, juohkehaš ferte gávdnat alccesis vuogas vuogi.

Sáhttá leat lossat geahččalit ođđa vugiid hárjehaddama oktavuođas, muhto dan gal galggašii dahkat, lohká Anja Graven.

– Lea dehálaš geahččalit ođđa diŋggaid ja bidjat dasa veahá áiggi. Go rumaš dasa hárjána de šaddá maid suohttasat.

Muhto álgoháviid ii leat gal beare álki, ferte vuos hárjánit daidda.

– Ii sáhte vuordit ahte vuosttaš hárjehaddamiin lea nu somá ja geahpas, muhto go don veahá joatkat hárjehaddamiin, de šaddá álkit.

Loahpas namuha ahte ii galgga badjelmearástallat, go dat ii ge leat buorre.

– Mun jáhkán dehálažžan olbmuide fuomášit ahte juohke diŋggas lea mearri. Nu lea maid hárjehaddamis.

Ášši gullui Dáppe Dál -sáddagis, guldal olles sáddaga dás: