NRK Meny
Normal

- Cosplay lea šaddan dego dávda

Johan Rasmus Eira lea cosplayer, ja su eallinvuohki lea áddestallat Sesame Street karaktera Cookie Monster.

jree

Shookie Monster ja eará cosplay-karakterat.

Foto: Daniel Granerud

Kárášjohkalaš Johan Rasmus Eira (29) lea cosplayer. Cosplay boahtá eaŋgalas sániin costume ja play, sámegillii kostyma ja stoahkan. Váldoulbmil lea gárvodit ja láhttet nu seammaláganin go vejolaš dan gean dal de leaččat govahallamin, leaš dal tv-spilla, filbma dahje eara media karaktera. Cosplay vulggii Japánas, ja lea dáid maŋimuš jagiid boahtán Norgii albma duođas. Johan Rasmusa karaktera namma lea Shookie Monster, ja galgá sulastahttit Sesame Street karaktera Cookie Monster.

Johan Rasmusa ustit dat bággii su vuolgit mielde cosplay-lágideapmái. Johan Rasmus muitala ahte lei ođas ja veahá imaš, muhto lei maiddái dat somámus maid son lei vásihan guhkes áigái. Maŋŋá dan son finai Norgga stuorámus lágideamis ja de šaddagođii dát dego dávdan sutnje, dál son ferte mátkkoštit juohke guovllus ja leat mielde cosplay-doaluin.

Johan

Johan Rasmus Eira

Foto: Priváhta

Ođđa eallinvuohki

Cosplay lea šaddan Johan Rasmusii eallinvuohkin. Son geavaha áiggi blogget, neavvut eará cosplayeriid, ráhkkanit mátkkiide ja son lea maiddái veahkkin ráhkkanahttimin olu dákkár doaluid. Son muitala lágideaddjiide mo eará sajiin barget, ja son geahččala addit ráđiid nu ahte lágideapmi šaddá nu buorre go vejolaš.

– Mun lean válljen dán šaddat dehálaš oassin iežan eallimis, nu ahte mun gal barggan dainna cosplayain albma duođas, ja mun barggan dainna measta juohke beaivvi, dadjá Johan Rasmus.

Johan Rasmus muitala ahte eatnašiin lea iežas karaktera, muhto de gávdnojit olbmot, geain lea moaddelot kostyma, ja sii leat guhkit áigge jámma bargan cosplayain. Johan Rasmusis lea dušše okta karaktera, Shookie Monster, muhto son lea bargamin eara karakterain maid. Son gohčoda iežas albma supernerdan, ja liiko ahte cosplay-doaluin leat spillat, govvaráiddut, filmmat ja eará iešguđetlágan mediat.

Makkár olbmot leat dán cosplayas, makkár beroštumit leat sis?
– Cosplay lea juoidá, maid álggahedje Japánas. Dat lea nu ahte don sáhtát gárvodit vaikko makkár karakteran media máilmmis, nu ahte doppe leat eatnašat geat liikojit spillaide, govvaráidduide, filmmaide ja diendiekkáriidda. Muhto dán áigge gal lea vaikko makkár olbmot doppe, ja ii leatge baggu ahte olmmoš cosplaye. Oainnat dát lea oalle sosiálalaš hommá ja doppe leat ollu dakkár doalut. Nu ahte dat geasuha oalle olu iešguđetge olbmuid, eanaš nuoraid.

Golbmii vuoitán cosplay-gilvvuid

jre

Shookie Monster ja Kárášjot-nieida Rakel Maria Nilsen Amidala karakteras.

Foto: Priváhta

Mii geavvá dáin doaluin?
– Dáin doaluin geavvá vaikko mii. Don sáhttát oahppat ovdamearka dihtii japánagiela, fotoshootaid, vuoiddadit, mo don galggat láhttet lávddi alde ja dieđusge beasat gávnnadit eará nuoraiguin. Dohko bohtet maiddái ollu neavttárat ja artistat, sihke jietnaaddi neavttárat ja aistton albma neavttárat. Mun lean ieš beassan intervjuestit dovddus neavttáriiguin, ja dat gal lei oalle somás ja stuorra vásáhus.

– Dákkár deaivvademiin dahká ieš dat cosplay-gilvu oalle stuorra oasi ja dat geasuha olbmuid. Das don čájehat makkár kostyma don leat ráhkadan ja man guhká don leat ádjánan dainna, ja de galggat neavttašit ja geahččalit áddestallat ja jievžžadit iežat karaktera nu bures go vejolaš. Jus don vuoittát dán gilvvus, de sáhtát don beassat Norgga ovddastit loahppagilvvuin eará riikkain. Ja de sáhtát vuoitit sihke ruđaid, mátkkiid ja vaikko maid, čilge Johan Rasmus.

Johan Rasmus ii leat gal rievtti mielde gilvalan cosplayerin, muhto son lea gal somá dihtii leamaš mielde moatti gilvvus. Son lea vuoitán golmma háve ja boahtán nubbin oktii. Johan Rasmus muitala ahte buohkat leat bures boahtin oassálastit cosplay-doaluide, muhto ale boađe dohko buorrendoallalas vuoiŋŋain gal...