Assisterande avdelingsdirektør Morten Hansen i UDi seier at dei har plikt til ikkje å gi visum når det er grunn til tru at søkjaren Shah Mohammad Rais har gitt feil opplysningar om årsaka til visumsøknaden.
Bokhandlaren frå Kabul, Shah Mohammad Rais. (Scanpix-foto)
- Vi kan ikkje sjå at noko er endra, Derfor opprettheld vi vedtaket om å tilbakekalle visumet, seier Morten Hansen.
UDI fryktar at bokhandlaren skal søkje politisk asyl i Noreg.
Bokhandlar Shah Mohammad Rais, kjend frå Åsne Seierstad si bok "Bokhandleren i Kabul", fekk innvilga visum til Noreg av den norske ambassaden i Islamabad 21. oktober i år.
Då oppgav han at han skulle dirve forarbeid til ei bok han skriv, samt å ha møte med det norske advokatkontoret sitt.
Åsne Seierstad skrev "Bokhandleren fra Kabul". Scanpix-foto)
Seinare har Rais sagt i intervju at han vil søkje politisk asyl i Noreg for seg og familien sin, fordi han meiner dei alle er i fare på grunn av innhaldet i boka til Åsne Seierstad.
Åsne Seierstad budde hjå familien Rais i hovudstaden Kabul i Afghanistan under si vitjing i byen. Seinare skreiv ho boka "Bokhandleren i Kabul" om opphaldet sitt i familien.
Shah Mohammad Rais har klaga på at ho i boka har skrive om private detaljar i familien sitt liv, noko som han meiner gjer at dei er i fare.