Unesco fryktar museumsdød på grunn av korona

Tysdag kom meldinga om at Noregs nest største kunstmuseum, Kode i Bergen, er i akutt pengenaud på grunn av Covid-19-tiltaka til styresmaktene. Dei står i fare for å gå konkurs i oktober om dei ikkje får tilført pengar.

Men kunstmuseet i Bergen er langt frå aleine om å ha problem.

Undersøkingar Unesco og den internasjonale museumsorganisasjonen Icom har gjennomført, viser at 90 prosent av musea i verda, rundt 85.000 institusjonar, har stengt midlertidig å grunn av pandemien.

Samtidig viser tala at kvart åttande museum står i fare for å måtte stenge permanent.

– Dette er urovekkande opplysningar, seier assisterande generaldirektør for kultur i Unesco, Ernesto Ottone Ramirez, til nyheitsbyrået Associated Press (AP).

Store museum tapar stort

Ifølge Unesco rammar krisa Latin-Amerika særleg hardt. Her er 99,4 prosent av musea stengde.

– Det vil seie at vi har eit heilt kontinent som er stengt. Det er første gong i historia, og det vil vere vanskeleg å kome seg gjennom denne krisa for desse institusjonane, seier Ottone.

Dei store institusjonane i byar som Paris, Amsterdam og Wien har tapt opp mot 80 prosent av inntektene sine dei siste vekene, ifølge kartlegginga. Det vil seie millionar av kroner i veka.

Musea er avhengige av tilføring av nye pengar for å kunne overleve seier Icom-president Suay Aksoy i ei pressemelding.

– Vi er sikre på at profesjonelle museum er i stand til å møte utfordringane Covid-19-pandemien gir. Men museumssektoren klarer ikkje å overleve utan støtte frå offentlege og private aktørar.

Opningar gir håp

Med reiserestriksjonar i fleire land, kjem ikkje dei store turiststraumane mange stader denne sommaren. Samtidig gir ei gradvis opning av fleire turistattraksjonar i Europa eit håp om lysare tider.

Fire museum som opna i Berlin i førre veke hadde 10.000 besøkande. Det er rundt 43 prosent av fjorårsnivået den same veka. Publikum måtte kjøpe billettar til bestemte tidspunkt for å avgrense kor mange som var inne samtidig.

• Les: EU vil åpne grensene etter korona: Turismen blir ikke som før
• Les: Trump truer med å kutte støtten til WHO. Hvilke konsekvenser får det?

I Italia har enkelte mindre museum og galleri opna. Det er foreløpig uvisst når dei større turistattraksjonane i Firenze, Roma og Vatikanet kan opne igjen.

Også i Frankrike ventar dei med å opne museum som Louvre og Pompidou-senteret.

Hellas har opna fleire kulturminne som Akropolis. Det er venta at fleire greske museum skal opne seinare i sommmar.