I spørretimen på Stortinget i dag kravde SV-leiar Audun Lysbakken svar på kvifor ikkje regjeringa slo alarm om trygdeskandalen tidlegere.
Det var første gongen statsminister Erna Solberg måtte svare i Stortinget om det som har skjedd.
Burde slått alarm
– Meiner statsministeren at regjeringa ikkje kunne og burde slått alarm før? ville SV-leiar Audun Lysbakken vite.
Statsministerens hovudsvar var at hovudfokuset no er å rydde opp.
– Eg meiner vi skal vere opne for det som kjem fram, alle steinar skal snuast, sa Solberg.
– Men det viktigaste vi gjer no er å rydde opp, slik at folk som ikkje har fått rettar dei skulle ha og er blitt dømde, skal få oppreisning.
– Vi har alle gjort feil
Lysbakken kritiserte at arbeids- og sosialdepartementet venta to veker frå dei fekk eit brev frå Nav 30. august i år om alvoret i saka. Han lurte på om statsministeren var fornøgd med at det tok så lang tid.
– Eg kjem ikkje til å seie meg nøgd med enkelttiltak, dette er ein del av granskinga. Vi bør alle i denne salen og i det offentlege Noreg vere audmjuke i denne saka. Vi har gjort feil. EØS-reglane har ikkje vore implementert på ein god nok måte, men mitt hovudfokus er å rydde i det som har skjedd, svarte Solberg i stortingssalen.
På fleire av spørsmåla ho fekk i stortingssalen valde Solberg å vise til at det er ei gransking på gang.
Saknar svar
– Regjeringa må kunne svare på spørsmål om si eiga handtering sjølv om det skal vere gransking, insisterte Lysbakken.
Til NRK utdjupar han:
– Dette er ein defensiv statsminister som skyver granskingsutvalet framfor seg. Det er ingenting i den granskinga som hindrar henne frå å gje ei vurdering av korleis regjeringa har jobba med Nav-skandalen. Mykje av det vi får vite no tyder på at alarmen burde gått tidlegare i regjeringa.
Det er fortsatt over eit halvt år til det regjeringsoppnemnde granskingsutvalet skal levere sin rapport 1. juni 2020.
– Har du ikkje tenkt å svare på nokon ting om korleis regjeringa har handtert Nav-skandalen før granskingsutvalet har levert sin rapport til sommaren, Solberg?
– Jau. Vi kjem til å gje Stortinget all den informasjonen dei treng knytta til behandlinga i kontroll- og konstitusjonskomiteen, seier statsministeren til NRK. – Men å gje vurderingar av kva eg synest om dei ulike etappene synest eg er vanskeleg før eg har sett eit heilskapleg bilete av ein granskingskommisjon. Eg trur ikkje det er riktig å gjere.
SV-leiaren meiner det er ei merkeleg haldning frå statsministeren.
– Kva er følgjen av at statsministeren ikkje svarar?
– Viss ho prøvar å unngå å svare på spørsmål frå Stortinget, så skyver ho heile prosessen ut i tid. Vi kan ikkje utsette alle dei viktige debattane til 1. juni neste år.
Krev fleire svar
Stortinget har ulikt arbeid på gang for å få vite korleis feil regeltolking kunne oppstå i Nav og kva som blir gjort for å rydde opp.
I går sendte også Stortingets kontroll- og konstitusjonskomite eit brev med fem konkrete spørsmål dei vil ha svar på til arbeids- og sosialminister Anniken Hauglie.
Det viktigaste komiteen vil vite er kva regjeringa gjer for å rydde opp for dei Nav-brukarane som har fått urettmessige fengselsstraffer eller tilbakebetalingskrav.