Ulukka skjedde då ein personbil og ein minibuss kolliderte front-mot-front, opplyser Telemark politidistrikt.
Det var føraren av personbilen, samt føraren og ein passasjer i minibussen som miste livet.
Det var til saman åtte personar i dei to bilane. Politiet fekk melding om ulukka klokka 00.40.
Kan ha vore høg fart
Dei tre omkomne er alle menn. Ein 63-åring, ein 46-åring og ein 19-åring. To omkom momentant, medan den tredje døydde på sjukehuset.
– Ut frå spreiing av vrakdelar på staden kan det vere snakk om høg fart, seier operasjonsleiar Jens Arne Bærland i Telemark politidistrikt til NRK.
Jaktlag på veg nordover
Dei sju mennene i minibussen var eit jaktlag frå Sørlandet på veg til Nord-Noreg. Dei hadde hengar med båt med seg. Det var også tre hundar med i minibussen, og ein av desse måtte avlivast.
Den omkomne sjåføren av minibussen er ein 63 år gamal mann frå Songdalen. Den omkomne passasjeren i minibussen er ein 46-åring frå Songdalen. Den omkomne føraren av personbilen er ein 19-åring frå Langesund i Bamble.
Dei fem skadde passasjerane i minibussen er to 58-åringar får Songdalen, ein 24-åring frå Songdalen, ein 54-åring frå Songdalen, og ein 49-åring frå Lillesand. Dei vart tekne til sjukehus, men det blir opplyst at dei berre er lettare skadde.
Ulukkesutsett strekning
Det har vore mange dødsulukker i dette området på E18 dei siste åra.
Vegen forbi ulukkesstaden var stengd i fleire timar i natt, men er no open for trafikk igjen.
Politiet kan førebels ikkje seie noko om årsaka til ulukka.
Ambulansepersonell kom raskt til ulukkesstaden.
Foto: Ole N. Olsen
