Direktoratet for samfunnstryggleik og beredskap (DSB) fryktar at det vil blussa opp store skogbrannar i løpet av dei neste dagane.
– Det er svært tørt mange stader i landet. Det har ikkje kome nedbør på lang, lang tid, fortel fungerande avdelingsdirektør i brann- og redningsavdelinga Hans Kristian Madsen.
Fire ekstra brannhelikopter i sør
Den lokale skogbrannfaren er stor i heile Noreg sør for Trøndelag, opplyser Kristian Madsen, fungerande avdelingsdirektør i brann- og redningsavdelinga i DSB.
Foto: Marit Gjellan / NRKBrannsjefar har meldt frå om stor skogbrannfare lokalt over heile Noreg sør for Trøndelag. Det er knusktørt på kysten av Vestlandet, på Austlandet og i innlandet.
DSB har styrkt beredskapen sin med tre ekstra brannhelikopter og har totalt fire maskinar i beredskap gjennom helga.
I Sel kommune i Oppland har evakuerte hyttebebuarar returnert etter skogbrannen som har herja det siste døgeret og brannen er sløkt.
Ein av dei, Per Øen er ikkje i tvil om at brannen lett kunne ha spreidd seg vidare til nye område.
– Mose, kratt og lyng og gras – alt er knusktørt, så det er greitt at brannmannskapa har klart å stoppa det der dei har stoppa det no, seier Øen.
Folk flest har også eit ansvar for å passa på, minner Madsen i DSB om.
– Det er viktig å vera svært forsiktig når ein er ute no. Lynnedslag får me ikkje gjort noko med, men me prøver å vera på alerten. Sivilforsvaret er klare til å hjelpa til landet rundt og brannvesenet er ganske godt førebudde på å kunne mobilisera store styrkar raskt.
Flaum- og jordskredfare i aust
Medan mange område i landet skrik etter ei skikkeleg rotbløyta, er det varsla så store nedbørsmengder på Austlandet og Østafjells at det laurdag er sendt ut flaumvarsel frå Noregs vassdrags- og energidirektorat (NVE).
Varselet gjeld for Telemark, Buskerud, Oppland og Hedmark søndag og måndag.
– Rydd opp i stikkrenner, grøfter og slukar, er vakthavande hydrolog i NVE, Ingeborg Kleivane, sitt råd til dei som bur i områda med flaumfare.
Foto: Stig Storheil / NVE– Det blir ikkje så ille som det var i Oslo for halvanna veke sidan, men varm og ustabil fuktig luft vil i desse områda gje kraftige bøyer og tore. Det er ein vêrtype som kjem til å vara i nokre dagar, i alle fall fram mot onsdag, fortel vakthavande hydrolog ved NVE, Ingeborg Kleivane til NRK.
Raskt aukande vassføring kan i desse områda medføra lokale overfløymingar og flaumskadar. Det er særleg i byar og tettbygde strok at faren for flaum er størst.
Hydrologen oppmodar folk i dei utsette områda til å ta grep.
– Rydd opp i stikkrenner, grøfter og slukar slik at vatnet får plass til å renna unna. Du kan også følgja nedbørsutviklinga i ditt område på yr.no sin værradar og på varsom.no, tilrår Kleivane.
Det kraftige regnvêret medfører i tillegg fare for jordskred i Rogaland, Hordaland, Telemark og i Agder-fylka frå laurdag.
