Sp-toppar får subsidiar i fleng

Listene frå Statens landbruksforvaltning over kven som får kva i produksjonstilskot i første halvår 2011, er no klare og tilgjengelege for allmennheita.

Oversikta viser at fleire høgtløna Senterpartiet-politikarar får meir i landbruksstøtte enn det gjennomsnittsbonden har i årsinntekt.

• Sjekk kven som får landbruksstøtte og kor mykje

Tredobbel støtte

I alt får om lag 45 000 foretak eller bønder utbetalt produksjonstilskot frå staten dette halvåret.

Nestleiar i Sp og olje- og energiminister Ola Borten Moe, stortingsrepresentant Per Olaf Lundteigen og den nyleg avgådde statsråden Terje Riis-Johansen er blant dei som står på lista.

Dei tre Sp-toppane får langt over gjennomsnittet i landbruksstøtte.

For medan gjennomsnittsbonden får om lag 114 000 kroner i tilskot, får Lundteigen det tredoble (340 000 kroner). Riis-Johansen kan innkassere 306 000, og Borten Moe 241 000 kroner.

• LES OGSÅ: Milliardærer får millioner i landbruksstøtte

– Får som fortent

– Dette er ei betaling me som bønder får for å utføra oppgåver som storsamfunnet meiner er viktige, som det å dyrka korn og å ha dyr på beitet for å halda jorda i hevd, seier Riis-Johansen, som no er Sp sin fylkesordførarkandidat i Telemark.

På garden i Skien har han 35 mjølkekyr og om lag 80 storfe til kjøttproduksjon. Dermed får han både areal- og kulturlandskapstilskot, tilskot til husdyr, beitetilskot og mjølkeproduksjonstilskot.

– Men det er kona som driv garden og er heiltidsbonde, ikkje eg. Det ville vore diskriminerande om ho fekk mindre i støtte fordi mannen hennar tener over gjennomsnittet, påpeikar Riis-Johansen.

Lundteigen får støtte for saue- og geitehald og for planteproduksjon. Borten Moe driv med kornproduksjon på garden sin i Trøndelag. NRK har ikkje lukkast med å få kontakt med Lundteigen og Borten Moe.

• LES OGSÅ: Fikk penger for kyr som ikke finnes

Viktig subsidie-pådrivar

Føremålet med produksjonstilskot i jordbruket er å bidra til eit aktivt og bærekraftig jordbruk i heile landet.

Sp er det partiet i Noreg som sterkast frontar distrikta og primærnæringa sine interesser, og er følgjeleg ein viktig beskyttar av subsidiert landbruk i Noreg.

I sitt prinsipp- og handlingsprogram for perioden 2009-2013 går Sp inn for å «framleis bruka skatt aktivt for å styrka økonomien i jordbruket», ved hjelp av midlar over statsbudsjettet og prisstyring.

Fordi fleire høgtløna Sp-politikar også er bønder, haustar også dei godt av landbruksstøtte-ordninga.

Trippel løn

I går fortalde NRK at styrtrike godseigarar er blant dei som får aller mest i landbruksstøtte frå den norske staten. Fleire norske milliardærar håvar inn millionar i subsidiar, noko Småbrukarlaget vil ha slutt på.

Tilsvarande er det også , ikkje overraskande, eit betydeleg lønsgap mellom stortingsrepresentantane og den gjengse bonde.

Stortingsrepresentantane har ei løn som er tre gonger så høg som årsinntekta til bonden - rundt 720 000 kroner i året.

Den norske gjennomsnittsbonden tente nemleg i fjor under 240 000 kroner, og mindre skal det bli i 2011, viser ferske kalkyler frå Budsjettnemnda for jordbruket (BFJ).

• SJÅ VIDEO: Bøndene krever 2,6 milliarder mer

I årets landbruksoppgjer har jordbruksorganisasjonane fremja høge krav om at bonden må få eit solid inntekstløft dersom matproduksjonen i Noreg skal auka i takt med befolkningsveksten.

• LES OGSÅ: Staten utsetter tilbud til bøndene