14 av 24 intensivsjukepleiarar ved thoraxkirurgisk seksjon ved Oslo universitetssjukehus, OUS, har sagt opp jobbane sine i protest mot sjukehusleiinga. Ytterlegare fem seier at dei vil gjere det same.
Dette kan føre til at hjartekirurgien ved Ullevål og Rikshospitalet kan bli slått saman tidlegare enn tidlegare planlagd, seier leiaren for hjartekirurgien.
Helseminister Ingvild Kjerkol seier det er ein krevjande situasjon.
Ei av sjukepleiarane som vil slutte, er Stine Molvær Nesseth. Ho er nyutdanna intensivsjukepleiar, men ho har bindingstid, og har difor ikkje levert oppseiinga si enno.
Seksjonen ho arbeider på har ansvar for sjukdommar som treng kirurgisk behandling i hjarte, lunge og sentrale blodårer. Den ligg på Ullevål sjukehus.
Redd for pasienttryggleiken
Leiinga ved OUS ønsker å samordne drifta på Ullevål med Rikshospitalet, slik at dei blir eitt senter for hjartekirurgi på OUS. Det har dei tilsette åtvara mot. Det var TV 2 som omtalte masseoppseiingane først.
Nesseth seier det er svært mykje uro på sjukehuset.
– Vi føler at leiarane ikkje høyrer på dei bekymringane vi kjem med. Det er kanskje det verste. Når vi seier at vi er redde for pasienttryggleiken, so føler vi at vi ikkje vert tekne på alvor.
– Det er veldig sårt å kjenne at ein er lett å erstatte. At det vi seier berre er tomme truslar.
Sjølv har ho begynt å sjå etter ny jobb. Ho har prøvd å finne ut kor mykje det vil koste henne å seie opp før bindingstida er ute, men har ikkje fått svar.
Dei tilsette er kritiske til budsjettkutta som skal gjennomførast på sjukehuset og nye turnusordningar.
Nesseth seier ho er usikker på framtida:
– Eg håper at leiinga skjøner at risikoen ved dei endringane dei ønsker, er så store, at dei kanskje må sjå seg om etter nye tiltak. Pasienttryggleiken er det aller viktigaste, seier ho til NRK.
Vil ha betre samordning
Klinikkleiar ved Hjarte-, lunge- og karklinikken ved OUS, Bjørn Bendz, seier seg lei for oppseiingane og kallar det ein alvorleg situasjon.
– Dette er ei veldig høgt verdsett helsepersonellgruppe og er ikkje lette å erstatte, understrekar han.
Bendz avviser at sjukehusleiinga ikkje høyrer på dei tilsette. Han viser til at OUS arbeider med å samle hjarte- og lungekirurgien på éin stad frå 2025. I dag er han delt på to stader, Ullevål og Rikshospitalet som ligg ein kilometer unna. I denne prosessen seier han at dei tilsette har vore involverte.
Han seier samstundes at han er usikker på kva sjukehusleiinga kunne ha gjort annleis for å halde på dei tilsette. Han vedgår likevel at informasjonen til dei tilsette ha vore betre.
– Det må vi ta på vår kappe.
Trur det blir stopp på Ullevål
Hovudtillitsvald Vegard Andreas Jacobsen i Norsk Sjukepleiarforbund meiner masseoppseiingane vil få store konsekvensar for drifta av hjarteseksjonen.
Han trur det ikkje vil bli praktisk mogleg å ha hjartekirurgi på Ullevål etter 1. mai.
Anestesilege ved Ullevål og tillitsvald for overlegane, Erik Høiskar, seier intensivsjukepleiarane er vanskelege å erstatte.
– Det er kritisk. Det er stor kirurgi dette dreier seg om, lungekreftkirurgi og hjartekirurgi. Desse intensivsjukepleiarane er heilt avgjerande for nettopp den behandlinga.
Kan framskunde flytting
Bendz avviser at oppseiingane er resultat av budsjettkutt. Han vil ikkje kople dette til eit pålegg frå den øvste sjukehusleiinga om å effektivisere.
– Dette har ingenting med kutta i sjukehuset å gjere. Dette handlar om å sikre framtida til hjartekirurgien i Oslo. At vi skal samlast på éin stad for å lage det beste senteret vi kan ha.
– Er pasienttryggleiken godt nok varetatt når over halvparten av sjukepleiarane er borte?
– Den kjem til å bli varetatt godt nok, for vi har tiltak som skal kompensere for dette. Det ligg jo i korta at vi må flytte verksemda frå Ullevål til Rikshospitalet, kanskje 2–2,5 år før vi hadde tenkt å gjere det.
Han viser og til at det finst ei fullt operativ avdeling på Rikshospitalet som kan ta seg av hjartekirurgi, om det ikkje blir mogeleg på Ullevål.
Bendz seier dei skal ha eit møte med dei tillitsvalde neste veke der dei mellom anna skal snakke om turnusen og korleis dei organiserer sommaren.
Kjerkol: Sjukehuset må finne løysingar
NRK har vore i kontakt med Helsedepartementet, som opplyser at helseminister Ingvild Kjerkol (Ap) ikkje ønsker å stille til intervju om saka.
Men kontoret hennar har sendt denne kommentaren per e-post:
– Vi både ønsker og trenger å behalde dyktige fagfolk i den offentlege helsetenesta, og intensivsjukepleiarar er ei viktig personellgruppe i sjukehusa. Det er openbert ei krevjande situasjon som har oppstått ved Oslo universitetssjukehus, ved at so mange viktige arbeidstakarar har sagt opp ved éi og same avdeling.
– Den aktuelle saka som er gjort kjent i dag, må no bli handtert av OUS, som både har arbeidsgjevaransvar og ansvar for forsvarlege tenester til befolkninga. Sjukehuset må, eventuelt i samarbeid med Helse Sør-Aust, finne løysingar som gir eit forsvarleg tenestetilbod til befolkninga også framover.
Opp i styret i neste veke
Styret i OUS skal vedta dei mykje omtalte kutta ved sjukehuset torsdag om ei veke. I ei melding på sjukehusets interne datanett, som NRK har sett, skriv administrerande direktør Bjørn Atle Bjørnbeth at krava til omstilling er dei same, trass i at regjeringa har varsla meir pengar til sjukehusa.
– Vi må redusere 4–500 årsverk i 2023. Vi står i tøffe omstillingar om dagen, og det blir jobba hardt for å finne måtar å redusere kostnadane våre på, skriv Bjørnbeth.
Nestleiaren i helse- og sosialutvalet i Oslo bystyre, Morten Edvardsen (Sp), er særleg kritisk til at kutta delvis skjer for å skaffe pengar til å bygge nye sjukehus på Gaustad og Aker.
– I staden for å skjerme pasientane for kutt, vel OUS å bruke dei ekstra midla frå regjeringa til bygg på gigantprosjektet på Gaustad. Det er totalt uansvarleg, meiner han.