I tillegg til Jensen var det tolv andre til stades på feiringa, skriv TV 2.
Dei gjeldande koronareglane i hovudstaden slår fast at det er forbode å samle over ti personar i private heimar.
– Vi var samla fleire enn ti personar, og fem var vaksinerte. Vi hadde ikkje fått med oss at dei nye tilrådingane frå FHI om å ikkje rekne beskytta personar i talet, ikkje gjaldt for Oslo, seier Jensen til kanalen.
– Eg beklagar dette på det sterkaste. Dersom vi får bot for dette regelbrotet, skal vi sjølvsagt betale, seier ho.
Vurderer etterforsking
Oslo-politiet stadfestar overfor NTB at dei vurderer om dei skal etterforske saka.
– Vi har sett det som kjem fram i media, og vurderer ut frå dette om det er aktuelt å opprette melding/etterforsking. Vi kjem tilbake til det – reknar med i morgon tidleg, skriv pressesjef Unni Grøndal i Oslo politidistrikt i ein SMS til NTB.
Tidlegare denne månaden vart Sylvi Listhaug valt som ny leiar av Framstegspartiet, og Jensen gjekk av etter å ha leidd partiet i 15 år.
Listhaug seier til TV 2 at ho er glad for at Jensen har lagt seg flat.
Solberg fekk bot
I mars blei det kjent at statsminister Erna Solberg (H) og familien braut smittevernreglane da ho feira 60-årsdagen på Geilo. Ho beklaga det som skjedde, og sa ho ville betale bota ho blei pålagt på 20.000 kroner.
Nestleiar i Arbeidarpartiet, Bjørnar Skjæran, blei også etterforska i forbindelse med eit nachspiel på eit hotellrom i Bodø i mars.
Saka blei lagt bort fordi samlinga ikkje blei sett på som eit arrangement.