Røe Isaksen seier han ikkje visste om dobbel løn

Fiskeriminister Geir Inge Sivertsen (H) heva millionløn både som statssekretær og som ordførar i to månader. Sjefen hans, Torbjørn Røe Isaksen (H), kjende ikkje til det.

Næringsminister Torbjørn Røe Isaksen på besøk på Vikingodden i Tønsberg.

Røe Isaksen og Sivertsen diskuterte aldri om det var riktig at Sivertsen skulle ta imot dobbel løn.

Foto: John-André Samuelsen / NRK

Dåverande næringsminister Torbjørn Røe Isaksen og Geir Inge Sivertsen blei samde om at han skulle få fullføre jobben som ordførar i Lenvik, sjølv om han tiltredde som statssekretær 4. november 2019.

Lenvik skulle slå seg saman med tre nabokommunar og ordførarvervet forsvann difor frå 1. januar 2020.

– Dette var ei forståing vi kom fram til da han tiltredde. Han skulle få fullføre ordførarjobben. Det syns eg var rimeleg, seier Isaksen til NRK.

Diskuterte ikkje dobbel løn

– Visste du om at han tok imot dobbel løn?

– Nei, det visste eg ikkje. Det snakka vi rett og slett ikkje om, seier Isaksen.

– Syns du det var rettferdig at han skulle ta imot to millionløner, begge betalt av skattebetalarane?

– Det har eg ingen kommentar til.

Fiskeriminister Geir-Inge Sivertsen under Skreifestivalen 2020 på Myre.

Geir Inge Sivertsen (H) er i hardt ver etter at det blei avslørt at han søkte om etterløn medan han tok imot løn som statssekretær.

Foto: Synnøve Sundby Fallmyr / NRK

– Departementet visste

På spørsmål om Sivertsen burde informert sjefen sin om at han tok imot dobbel løn, svarar Sivertsen slik:

– Næringsdepartementet visste, og det blei også kommunisert når eg blei spurd om å tiltre som statssekretær, at eg måtte vidareføre rolla som ordførar i Lenvik. Så det var alle informert om, seier Sivertsen

– Syns du det er moralsk rett å ta imot dobbelt millionløn frå det offentlege?

– Eg hadde to jobbar, ein som statssekretær og ein som ordførar. Eg meiner det er riktig å få betalt for dei jobbane ein gjer, seier Sivertsen til NRK.

Tilbakebetalar etterløn

Isaksen seier han heller ikkje kjende til eller diskuterte etterløna Sivertsen søkte om. Dagbladet avslørte i førre veke at Sivertsen fekk 120.000 i etterlønn for ordførarjobben han hadde hatt, samtidig som han tok imot full løn som statssekretær.

– Eg skulle aldri ha søkt om etterløn, seier Sivertsen til NRK.

Han har no planar om å betale tilbake dei 120.000.

Isaksen seier Sivertsen var fullt operativ frå han byrja i starten av november og utførte jobben sin som statssekretær på heilt vanleg måte.

Statsminister Erna Solberg på regjeringskonferanse

Sivertsen vart fiskeriminister 24. januar.

Foto: Vidar Ruud / NTB scanpix

200 prosent jobb

Sivertsen har tidlegare fortald NRK at han jobba 200 prosent desse to månadane.

– Eg jobba dobbelt.

– Jobba du 16 timar i døgnet?

– Kor mange timar i døgnet vil eg ikkje spekulere i, men eg forsøkte etter beste evne å vareta begge funksjonar, seier Sivertsen.

AKTUELT NÅ

SISTE NYTT

Siste meldinger