Mann i tenåra frå området skoten på Stovner

Ein mann i tenåra frå området vart skoten på Stovner måndag kveld. Han er utanfor livsfare.

Måndag formiddag har politiet avhøyrd mannen. Politiet leiter etter ein eller fleire gjerningspersonar.

– Per no er det ingen som er gripne. Vi har jobba gjennom natta med søk og vitneavhøyr. No går vi gjennom den informasjonen vi har, så får vi sjå om den leder oss i retning av nokon mistenkte, seier operasjonsleiar Tor Guldbrandsen tysdag.

Skytinga skal ha skjedd i ein undergang. Han skal ha teke seg til plassen utanfor Stovner Senter, der han blei funnen liggande på bakken.

Politiet ber publikum om tips.

Ukjent motiv

Bakteppet for hendinga er førebels ikkje kjent. Men innsatsleiar Svein Arild Jørundland ved politiet vil ikkje utelukke at skytinga kan ha noko med drapet på Mortensrud å gjere.

– Vi ser på om det er tilknytingar mellom dei ulike episodane som har vore i Oslo den siste tida, også denne episoden, sa Jørundland måndag kveld.

Han fortel vidare at den unge mannen blei skoten i magen og at han har vore på operasjonsbordet.

Såg folk springe vekk

Politiet opplyste måndag at fleire personar skal ha blitt sett løpande vekk frå åstaden. Vitne såg fleire springe frå åstaden og i retning T-banen.

Ei av dei var Aysha Rizwan (21) som gjekk av T-banen og var ved Stovner Senter.

Der såg ho først ein politibil og høyrde hundar som glefsa. Så ser ho nokon gutar som skreik og sprang vekk.

– Eg blei forvirra då eg såg det. Kvifor blir det ikkje slutt på dette? Eg blir skikkeleg lei meg og sur når eg tenker på det, seier ho til NRK.

– Blei veldig redd

NRK har snakka med fleire som var i området då skytinga skjedde. Dei fortel at dei er skaka over det som har skjedd.

Også Reja var i området. Ho kom ut frå jobben like etter klokka 21 då ho høyrde to skot.

– Eg trudde først at det var nokon ungdomar som tulla, men så forstod eg at det var skot eg hadde høyrt. Så såg eg fleire ungdomar springe mot T-banen.

– Blei du redd?

– Eg blei veldig redd, seier Reja.