– Dette synet minte meg om 11.september

Newyorkaren Ian Dutton var i går vitne til dramaet i Oslo sentrum frå hotellrommet sitt like i nærleiken av regjeringskvartalet. For Dutton gav bombeeksplosjonen urovekkjande assosiasjonar.

Han var nemleg også til stades på Manhattan i New York den 11.september 2001, då byen vart råka av av det mest omfattande terroranslaget i USA si historie.

– Det bygde seg opp ein tjukk vegg av støv og røyk like etter eksplosjonen i Oslo. Røyk, flammar, ei stor støvsky og raserte bygningar. Dette synet minte meg om 11.september, fortel Dutton til nettavisa NY Daily News.

• OVERSIKT: Alt om terror-åtaket 22.juli

Sjokk og forvirring

Som så mange andre av sine landsmenn gløymer Dutton aldri kvar han var den 11.september for ti år sidan.

Då det første flyet small inn i World Trade Center denne klarvêrsdagen i 2001, la Dutton på sprang frå bustaden sin på nedre Manhattan for å hjelpa til. Han kom fram i det det eine tvillingtårnet rasa saman, og blei innhylla i ei svær sky av støv og røyk.

– Eit skred av støv og skitt kom veltande mot meg. Eg hadde vanskeleg for å pusta, og det var desse minna som kom tilbake då eg såg støvskyene som kom veltande over menneska i Oslo sentrum i går, fortel Dutton.

Sjølv om bomba i Oslo ikkje kan samanliknast med 9/11-terroren i heimlandet, fortel Dutton til CNN at sjokket og forvirringa i etterkant av eksplosjonen også gav han sterke assosiasjonar til det han var vitne til for ti år sidan.

• LES OGSÅ: En rystende tragedie

(Saka held fram under biletet)

– Som eit lynnedslag

Piloten Dutton blei bokstaveleg talt riven ut av ettermiddagsluren sin då bombeeksplosjonen råka Oslo sentrum i går kveld.

31-åringen sjekka inn på eit hotell i Oslo sentrum få timar før området skulle bli forvandla til eit kaotisk og blodig terrormål.

– Det var som om eit lynnedslag trefte senga mi. Eksplosjonen slo lufta ut av meg, kasta meg ut av senga og skaka hotellet som eit jordskjelv, seier Dutton.

• LES OGSÅ: Stoltenberg: – Som et mareritt

(Saka held fram under biletet)

Samhald og nasjonalisme

Frå hotellrommet sitt i 28.etasje fekk han ei god oversikt over det som skjedde. Etter å hasendt bilete til CNN, blei han raskt kontakta av ei lang rekkje internasjonale media.

Dutton fekk dessutan ei kjensle av eit sterkt samhald blant det norske folk, på same måte som innbyggjarane i New York stod saman den lagnadstunge dagen i 2001.

– Det rår ei stemning av nasjonal stoltheit og samhald her i Noreg no. Det var nettopp det som skjedde i USA i timane og dagane etter 9/11, seier Dutton, som reiste tilbake til USA laurdag morgon til NY Daily News.

• LES OGSÅ: – Dere skal ikke få ødelegge oss