Omdømmeekspert: – Frp og Siv Jensen har fått døra midt i ansiktet

– Å ikkje innfri politiske lovnader er alltid øydeleggande for alle parti. Samtidig trur eg at folk flest oppfattar at Frp verkeleg vil ha Krekar ut av landet, men får det altså ikkje til, seier Aabø til NRK.

• LES OGSÅ: Opphaldsstad for Krekar kan vere klar i neste veke

– Ei pinleg affære

Jarle Aabø trur ikkje dette skadar tilliten som veljarane har til partiet på lang sikt, men meiner at tilliten har fått seg ein knekk. Han meiner likevel at dette er ei svært pinleg affære for partiet.

– Men folk gløymer fort, og det er jo ikkje akkurat ei bombe at politikarar bryt lovnader. Kor mykje dette skadar tilliten framover, er avhengig av korleis Framstegspartiet handterer si omdømmekrise, seier Aabø.

– Forvirrar veljarane

Politisk kommentator i NRK, Lars Nehru Sand seier det ikkje er uvanleg at eit parti bryt eit valløfte.

– Lenge har Frp sagt at dei skal sende mulla Krekar ut av landet innan 100 dagar etter at dei fekk makta. Det som er interessant her er at Framstegspartiet no adopterer heile forklaringa til tidlegare regjeringar og Arbeidarpartiet, seier Sand.

– Det er ikkje uvanleg at parti bryt eit valløfte. Men ofte skuldast det pengemangel eller uventa faktorar, legg Sand til.

Innhenta av realitetane

Sigurd Grytten i Zynk communication seier Frp har gitt inntrykk av at verda ser annleis ut enn det tidlegare regjeringar har sagt.

– Bompenge-saka har nok vore viktigare for veljarane til Frp enn det Krekar-saka har vore. Så det løftebrotet har nok vore verre enn at dei ikkje får sendt ut Krekar. Det dei får til, er ting som ikkje er fullt så viktig, som ståhjuling og poker, seier Grytten.

Han meiner Frp som ferske i regjering vert innhenta av realiteten:

– No veit dei kva som må til for å få igjennom saker. Difor er det ekstra viktig at dei innfrir på komande løfter.