Ny «eksotisk» smuglarmetode avslørt

Det er seint på kvelden den 20 november 2013. Tollvesenet har hatt eit kriminelt miljø med «ungdom i 20 åra» i kikerten over ein lengre periode. Denne kvelden er fleire frå dette miljøet om bord på Superspeed 2 – Color Line si ferje mellom Hirtshals og Larvik.

Tollvesenet har folk om bord i ferja, og følgjer dei mistenkte med argusauge. Fleire tollbetjentar står parate i landkontrollen i Larvik saman med politi. Det er mistanke om narkotikasmugling.

Kontroll.

Dei mistenkte blir plukka ut og hundane markerer for funn. Etter å ha endevendt bilen er det likevel ingen narkotiske stoff å finna.

Har dei kvitta seg med det under overfarten?

Tre tilfelle på eitt år

Først klokka 02 om natta får Tollvesenet og politiet stadfesta mistanken sin. Ein lettbåt blir observert på veg utover. Nokre timar seinare lokaliserer Kystvakta smuglarpartiet i vasskorpa nær Grimstad – ei plastflaske med eit halvt kilo sterk hasjisj.

Cannabis-beslaget i Grimstad er eitt av tre som er gjort i løpet av det siste året etter avsløringar av ein ny smuglarmetode i Noreg:

1. Mindre parti narkotika i GPS-utstyrte i 1-1,5 liters plastflasker innsurra i teip blir droppa frå hurtiggåande ferjer mellom Noreg og Danmark.
2. Mottakar hentar flaskene med småbåtar ved hjelp av GPS -peilaren og sel narkotikaen ulovleg i Noreg.

Metoden har aldri blitt oppdaga i Noreg før, etter det Tollvesenet kjenner til.

– Dette er ganske eksotisk, spanande og avansert smugling. Etter det eg veit er dette ukjent modus for smugling her i landet, seier tolldirektør Bjørn Røse til NRK.

– Det er vanskeleg å oppdaga dette. Me observerte at det var noko som gjekk føre seg, blei mistenksame, gjekk det systematisk nærare i saumane og fann ut kva det var. Det var ikkje bra saker, legg Røse til.

• LES OGSÅ: Smugling av halvfabrikat er ny trend
• SJÅ GRAFIKK: Dette er dei nye narkorutene

– Til skrekk og åtvaring

Tolldirektøren poengterer at godt samarbeid mellom Tollvesenet, Kystvakta og politiet gjorde at dei greidde å knekkja GPS-kodane og finna flaskene.

Sakene er no under etterforsking. Minst seks personar er sikta i saka frå Grimstad. Tre andre har vore inne til avhøyr i samband med eit flaskefunn gjort av eit politihelikopter i Vestfold i juni i år. D ei tre skal i nye avhøyr torsdag, opplyser kontorsjefen for Tollvesenet i Sandefjord, Audun Rønningen til NRK.

– Me veit at dropp av narkotika skjer, ikkje berre frå ferjene som går frå Larvik og Sandefjord. Det er grunn til å tru at dette skjer fleire stader, seier Rønningen.

Avsløringane av tre forsøk på flaskesmugling i løpet av eit år gir likevel tolldirektøren håp om å få bukt med det nye eksotiske innslaget blant dei mange smuglarmetodane.

– Eg håpar våre avsløringar skremmer andre frå å prøva seg på denne typen smugling, seier Røse.