Noreg gjeninnfører grensekontroll

Noreg gjeninnfører grensekontrollen langs grensa til Schengen i perioden 3.–12. desember for å hindre eventuelle uromoment å kome til landet før utdelinga av Nobels fredspris.

Grenseovergang ved Berby i Halden

Det blir innført grensekontroll igjen i perioden 3.–12. desember.

Foto: Rainer Prang / NRK
Bent Tanstad
Journalist

Ingen får kome inn i landet utan eit gyldig pass, og alle som har tenkt seg til landet må rekne med å bli sjekka på grenseovergangane, opplyser Politiet i ei pressemelding.

Sikre ro og orden

Føremålet er å sikre den offentlege orden og den indre tryggleiken, inkludert å førebyggje innreise av potensielt valdelege aktørar i samband med fredsprisutdelinga, heiter det.

Reisande må vere førebudde på å bli kontrollerte i passkontroll ved alle reiser inn og ut av Noreg.

Seniorrådgjevar Ellen Ahnfelt i Politidirektoratet seier til NRK.no at avgjerda er teken etter ei trusselvurdering. Det vart også innført grensekontroll då USAs president Barack Obama fekk fredsprisen i 2009.

Må vise pass

Det betyr, seier ho, at alle som reiser inn til Noreg, både med fly, tog, ferje, buss og personbil, kan bli bedne om å vise pass, også ved reiser i Skandinavia. Det er ikkje snakk om å setje inn ekstra politistyrkar ved grenseovergangane, kan ho fortelje.

Informasjonen om grensekontroll går ut til alle land i Schengen-samarbeidet, slik at det enkelte landet har ansvar for å informere sine borgarar om tiltaket. Det at enkelte land innfører grensekontroll skjer relativt ofte, fortel Ahnfelt, blant anna ved større sportsarrangementet.

Laster innhold, vennligst vent..
Laster innhold, vennligst vent..

SISTE NYTT

Siste meldinger