Henriette skulle berre bade – mista nesten foten

Det er ein varm julidag. Henriette Berle Broch ligg på brygga og solar seg. Ho bestemmer seg for å kjøle seg ned, og hoppar i sjøen.

Det skal vise seg å bli eit skjebnesvangert bad.

I vatnet kjem Henriette borti ein kjetting med skarpe skjel som er festa til brygga, og ho får eit kutt i foten.

– Det var ingenting som tilsa at det skulle vere spesielt alvorleg. Det var berre eit vanleg kutt som ein får i sjøen, eit lite uhell, fortel ho.

Ho skyl foten i saltvatn, slik ho har lært i barndomen, og prøvar å reinse og stripse kuttet sjølv.

Etter kvart blir såret til Henriette vondare og vondare, og foten hovnar opp.

Kuttet skal nesten koste ho foten.

Sjå korleis foten såg ut etter den alvorlege infeksjonen lenger nede i saka. NB! Sterke bilete.

Kjøtetande bakterie

Henriette får kuttet i foten fredag ettermiddag. Søndag blir ho send til hasteoperasjon på sjukehuset.

– Det burde kanskje ringt nokre bjøller tidlegare, men ein vil jo ikkje forstyrre med noko som ikkje er så alvorleg.

Men alvorleg er nettopp det kuttet i foten viser seg å vere. Ho har fått ein infeksjon med kjøtetande bakteriar.

Legane fortel at dei kanskje må amputere foten. Dersom bakterien spreier seg kan ho døy.

– Det var veldig nære på. Får du kjøtetande bakteriar i blodet står det om livet. Eg hadde to eller tre operasjonar første døgnet, og då sa dei til meg at dei kanskje måtte ta foten min som livreddande tiltak.

Låg risiko i sommar

Det finst fleire typar kjøtetande bakteriar som kan føre til infeksjon. Nokre av dei, vibrio og shewanella, finst i sjøen, og dei trivst ekstra godt når det er varmt i vatnet.

Desse bakteriane er mest vanlege i tropiske strøk, men dei er òg å finne langs kysten i Sør-Noreg.

Så langt i sommar er risikoen for infeksjon låg og avgrensa til Oslofjordområdet og ned langs Østfold-og Vestfoldkysten, fortel Line Ødegård Angeloff i Folkehelseinstituttet.

Det er rapportert i overkant av 50 milde infeksjonar, men ingen alvorlege tilfelle i Noreg denne sommaren.

Fleire infeksjonar ved varmare somrar

I fjor var det derimot to alvorlege tilfelle, og sommaren 2018 fekk åtte personar alvorleg vibrio- og shewanellainfeksjon etter bading i Oslofjorden.

Etter «ekstremsommaren» 2018 starta FHI eit forskingsprosjekt for å undersøkje om slike vibrio- og shewanellainfeksjonar aukar med klimaendringane.

– Førebelse resultat viser at talet på sjukdomstilfelle har auka på spesielt varme somrar. Rapporterte tilfelle i 2018 var nesten tre gongar så mange som gjennomsnittet av tidlegare år, forklarar Angeloff i FHI.

Prosjektet viser òg at risikoen for å utvikle ein alvorleg infeksjon aukar med alderen, og han er høgst for personar over 65 år.

– Kjempeheldig

Henriette får ikkje påvist vibrio eller shewanella, men diverse andre bakteriar som legane meiner ho fekk i sjøen. Ho får også påvist streptokokk A.

Etter sju veker på sjukehus, over ti operasjonar og hudtransplantasjon, får Henriette forlate sjukehuset med foten i behald.

– Eg er så imponert over legane på Bærum sjukehus. Dei redda livet mitt – i alle fall foten!

– Eg var superheldig som fekk bakteriar som responderer på antibiotika, fortel Henriette, som er uroa for det aukande problemet med antibiotikaresistens i verda.

– Kontakt lege

Tilbake på brygga, eitt år seinare, går Henriette lett og ledig på foten. Når ho tar av skoen kan ein likevel sjå tydelege spor etter den farlege infeksjonen.

Ho vil ikkje råde folk frå å bade, men minner om at ein må vere merksame og ta forholdsreglar.

– For meg er det viktig å fortelje historia mi for at folk skal ta infeksjonar alvorleg og ta kontakt med legevakt umiddelbart om dei opplever smerter som ikkje samsvarar med skaden, for det kan stå om livet.