Salet av den svært populære elbilen Jaguar I-pace i fjor vår, har ført til at merkeforhandlarane kan rapportere om store forskjellar i omsetninga frå i fjor vår til i år. Det utløyser millionar i koronastønad frå krisepakken til regjeringa, skriv Klassekampen.
AS Insignia får 1,3 millionar kroner frå regjeringa, og Motorpool Handel AS får 1,3 millionar.
Totalt har bilbransjen fått 50 millionar kroner i stønad for å handtere utfordringane knytt til virusutbrotet.
Forstår at det er provoserande
– Eg forstår godt at det kan verke provoserande når luksusbilforhandlarar får pengar frå staten fordi salet har droppa. Men viss vi ser større på det, har vi over 40 tilsette som fortener jobb, seier administrerande direktør Thomas Øvreseth i Insignia til avisa.
Han seier at drifta gjekk med underskot fram til den populære el-modellen vart lansert. Etter at etterspurnaden auka kraftig, vart drifta kraftig skalert opp med fleire tilsette og større lokale.