Marcus Rolandsen, leiar av stiftinga Martines minnefond for rettferd, seier det er uaktuelt for stiftinga og familien å gå med på ei rettssak i Jemen.
Dette trass i at Jemen sin ambassadør til Noreg i dag sa at Farouk Abdulhak aldri kjem til å bli utlevert frå landet.
Stiftinga held fram kampen om å få starta ei rettssak i Storbritannia.
Stolar ikkje på jemenittisk rettsvesen
– Me ønskjer først og fremst å nytte rettssystemet i det landet den kriminelle handlinga fann stad. Det er i tråd med ønska til dei etterlatne.
– Me meiner at britisk rettsvesen syt for at dei mistenkte vil bli sikra rettferd. Me har ikkje grunn til å tru at dei jemenittiske styresmaktene vil setje i verk ei rettferdig rettssak, seier Marcus Rolandsen til NRK.no.
Ambassadøren i Jemen seier dei vil ta omsyn til familien til Martine sine ønskjer om at det ikkje blir utført dødsstraff. Rolandsen vil ikkje kommentere om dette har noko å seie for familien.
- LES OGSÅ:
- LES OGSÅ:
– Fryktar de at Farouk Abdulhak aldri kjem til å svare for sine handlingar?
– Me har all grunn til å tru at Farouk vil bli stilt til ansvar for sine gjerningar, og me håpar det vil bli gjort på ein fredeleg måte, seier Rolandsen som understrekar at ei rettssak i Storbritannia framleis er primærmålet for stiftinga og familien.
Eit liv som flyktning
– Det er viktig å understreke at drap ikkje kan bli forelda i Storbritannia, og difor kan det praktisk tala gjere han til flyktning for resten av livet.
– Ei manglande avtale om frivillig utlevering vil føre til at han blir dømd til eit liv i evig flukt, seier Marcus Rolandsen.
Farouk Abdulhak er rekna som ein av dei mest ettersøkte kriminelle av Scotland Yard. Han er også etterlyst via Interpol.
- LES OGSÅ:
Martine Vik Magnussen (23) frå Nesøya i Asker vart drepen natt til 14. mars 2008 i London.
Britisk politi har sikta medstudenten Farouk Abdulhak, som rømde til heimlandet same dag, for valdtekt og drap.
Farouk Abdulhak drap Martine Vik Magnussen i London i 2008.
Foto: Scanpix
