– Køyr forsiktig!

Det er særskild i Agder-fylka, Telemark og over heile Austlandet at vegane har vore glatte og vêret vore lite gjestmildt.

– Særs glatt

I Birkenes i Aust-Agder er ein 72 år gamal mann livstrugande skadd etter at bilen hamna i ei elv. Også i Risør hamna ein bil i grøfta. Kvinna og barnet som sat i bilen vart sendte til legevakta for medisinsk sjekk etter ulukka.

Vegane i området er svært glatte, seier Ingrid Mæhre i Agder politidistrikt til NRK laurdag.

– Me har fått melding om at det er særs glatt fleire stadar på Sørlandet i dag, særskild i Indre Agder. Fleire bilar har køyrt av vegen og kollidert. Folk bør difor køyre forsiktig.

Glatt på heile Austlandet

Også i nabofylket Telemark hamna ein bil på taket laurdag. Tre personar kom uskadde frå ulukka. Politiet melder om spegelblanke vegar, og at det i det heile tatt er vanskeleg å stå på beina.

• LES OGSÅ: Lå fastklemt under buss

Endå litt lengre aust køyrde ein bil utanfor vegen i Tønsberg. Kvinna som sat i bilen vart sendt til legevakt med ryggsmerter. I nabobyen Sandefjord kom to bilar borti kvarandre, og to personar måtte til lege for sjekk.

Mellom Hamar og Elverum i Hedmark hamna ein buss og ein semitrailer utanfor vegen. Politiet i Hedmark fortel om kaotiske tilstandar på vegane i Innlandet laurdag formiddag, men personskadar har førebels ikkje funne stad.

– Folk må vere forsiktige og ta seg god tid. På den måten kan dei unngå fare på dei glatte vegane, seier operasjonsleiar ved Hedmark politidistrikt, Henning Olsen.

Også i Sogn og Trondheim har det vore mindre trafikkulukker i dag.

Statssekretær i trafikkaos

Ein av dei som vart ståande fast i trafikken i dag er statssekretær i samferdselsdepartementet, Bård Hoksrud, som var på veg frå Oslo til Våler i Hedmark.

– Det var ein del lastebilar og personbilar som låg strødde langs vegen. Det viser behovet for betre opplæring og betre kompetanse på å køyre på norske vegar, seier Hoksrud som tidlegare har langa ut mot utanlandske sjåførar som ikkje har kunnskap om norske køyretilhøve vinterstid.

Vanskelege tilhøve også i morgon

Dei fleste stadane er det underkjølt regn som har skapt dei glatte vegane laurdag. Statsmeteorolog Inger-Lise Aasen Askautrud fortel at det også søndag vil bli vanskeleg køyretilhøve, men då av heilt andre grunnar.

– Det er meldt eit kraftig lågtrykk inn over Sør-Noreg søndag, med mykje vatn og vind. Nedbøren vil starte som sludd og snø mange stader på Indre Austlandet. Etter kvart vil temperaturen stige og sluddet smelte, fortel Askautrud.

• LES OGSÅ: Varsler femårsflom på Østlandet

Mellom 30 og 70 millimeter med nedbør er venta i løpet av søndagen, og når det smelta snøvatnet blandar seg med regnet vil det bli mykje vatn i vegbanen og vanskelege køyretilhøve, åtvarar meteorologen.

Det er sendt ut varsel om vanskeleg køyretilhøve, og fleire fjellovergangar kan bli stengte i løpet av helga, avsluttar Askautrud.