Dei tre partileiarane er på plass i Hurdal for å starta sonderingane om å danna ei fleirtalsregjering.
– Vi har fått eit veldig klart mandat frå veljarane, og det er skifte av regjering, sa Ap-leiar Jonas Gahr Støre før sonderingane starta.
Klokka 10 sette partia seg ned for å sondere. Etter det NRK forstår er målet å vere ferdig sonderte innan måndag, og at Støre håpar at sjølve forhandlingane kan starte rett over helga.
– Det er sakene som avgjer. Kvart parti må kjenne seg igjen, og vi må legge stor vekt på at kvart parti må sjå profilen sin i eit regjeringsprosjekt. Og så må vi eige det prosjektet saman, sa Støre.
Bryt ut i latter
Senterpartileiar Trygve Slagsvold Vedum sa at dei skal bruke tida godt for å finne ut om det er grunnlag for forhandlingar.
Sjølv om det er mange saker der partia ikkje er samde, vart det god stemning og latter då Støre avslørte ein privat detalj om Vedum.
Det viser seg nemleg at Vedum har ei heilt spesiell tilknytning til staden.
To eller tre parti?
Både Arbeidarpartiet og SV ønskjer seg ei trepartiregjering. Senterpartiet har heile vegen halde på ønsket om ei Ap/Sp-regjering, utan SV.
Samtidig har Vedum vore påpasseleg med å aldri lukka døra heilt for SV.
– Eg er først og fremst nysgjerrig på å finne ut kva vi kan få til, og det er det vi er her for å finne ut, sa SV-leiar Audun Lysbakken før han gjekk inn til sonderingane.
Spissare krav
Dei tre partileiarane har så langt halde tett om kva saker dei skal snakke om, og kva som peiker seg ut som dei nøttene som vert hardast å knekke.
– Det er vikig å kjenne kulturen og prioriteringane til dei andre partia om ein skal klare å kome fram til ei god regjeringsplatform, seier tidlegare SV-leiar Kristin Halvorsen.
– Det er viktig å forstå kva bakland dei har å ta omsyn til, og kva dei ønskjer å oppnå i politikken.
For 16 år sidan sat ho som partileiar for SV ved forhandlingbordet på Soria Moria, saman med Arbeidarpartiet og Senterpartiet.
Denne gongen er krava frå SV spissare, og ho trur at klima og miljø blir det vanskelegaste for partia å bli samde om.