Politiet i Finnmark fekk søndag morgon melding om knivstikking i ei leilegheit i Alta. Då dei kom fram, fann dei ein hardt skadd person etter fleire stikk i armen og overkroppen. Politiet starta livreddande førstehjelp for å få stoppa blødingar.
Mannen er sendt til Alta helsesenter, og ikkje til sjukehus i Tromsø eller Hammerfest. Skadane ser ut til å vere mindre alvorlege enn det ein først trudde, og det skal ikkje vere fare for livet til mannen, skriv politiet på Twitter.
Operasjonsleiar Svein Erik Jacobsen seier ein mistenkt blei arrestert på staden.
– Ei kvinne i 20-åra er gripen av politiet, medan helsepersonell har teke hand om mannen som er i same alder.
Vitne inne til avhøyr
Det skal ha vore ein relasjon mellom gjerningsperson og offer, som budde på same adresse. Dei var også kjende for politiet frå tidlegare. Det var fleire vitne til ugjerninga, seier Jacobsen.
– Vi har ikkje oversikt over kva som skal ha skjedd, men vi har teke inn fire personar som var til stades då dette skjedde.
Politiet seier saka i Alta er ei alvorleg valdssak, og at dei kjem til å bruke krimteknikarar for å få betre oversikt over kva som har skjedd i leilegheita.
Foto: André Bendixen / NRKJacobsen seier det er mykje blod i leilegheita, og at dei skal bruke krimteknikarar for å få betre oversikt over kva som har skjedd.
Ifølgje NTB er det eine vitnet veldig prega av situasjonen og er i sjokktilstand. Vedkomande får hjelp av helsepersonell.
