Fleire fiskarar fortel NRK om juks med kvitteringar og at fiskemottaka betalar for mindre fisk enn fiskarane leverer, men NRK kan ikkje dokumentere omfanget av fiskejukset.
Leiar i Norges Kystfiskarlag, Arne Pedersen, blir også kontakta av fiskarar om ulovlege forhold i næringa.
– Det er umogleg for oss å fastslå kor stort omfanget er, men det er ikkje til å stikke under ein stol at vi ofte får meldingar inn til oss om at det skjer, seier Pedersen.
Han meiner styresmaktene må ha fleire kontrollar.
– Fiskeristyresmaktene er litt for slepphendte i forhold til heile denne problematikken. Det er eit myndigheitsansvar å lage system og føre kontroll.
– Systemet er lett å manipulere
SV- politikar og leiar i Gjæsver Fiskarlag, Johnny Ingebrigtsen, meiner det er lett for fiskarar og fiskekjøparar å snike seg unna lover og reglar slik systemet med kontrollar er i dag.
– Vi har eit kontrollregime der dei som driv kontroll berre skal sjå dokumentasjon og sjå på papir. Det er veldig lett å manipulere. Det dei burde gjer var å få fleire folk ut på kaia, ut på fabrikkane. Så dei får sjøvatn på støvlane, seier Ingebrigtsen.
Også seksjonssjef i Fiskeridirektoratet Einar Ellingsen, trur at meir kontroll hadde hatt meir preventiv verknad, men han legg til at det er ressursane som styrer.
– Det er budsjetta som bestemmer nivået, så det er slik sett eit politisk spørsmål, seier Ellingsen.