Kongen og følgjet hans kom til Troll i går kveld, etter å ha kryssa Sørishavet frå Cape Town i Sør-Afrika. I dag var det tid for omvising på den norske forskingsstasjonen i Dronning Maud Land.
- Les også: Kong Harald framme i Antarktis
I strålande ver fekk kongen gjere seg kjend med området, og det forskingsarbeidet som finn stad her. Saman med klima- og miljøminister Tine Sundtoft (H), justisminister Anders Anundsen (Frp) og resten av delegasjonen fekk kongen høyre korleis isen i Antarktis minkar og påverkar havnivået i verda.
– Den isen som kjem frå innlandsplatået og flyt ut over havet, kjem i kontakt med havvatn som i dag er varmare enn tidlegare. Dermed smeltar isen, og verdshava blir tilført ferskvatn som får havnivået til å stige, fortel direktør for Norsk Polarinstitutt, Jan-Gunnar Winther.
Forureining frå Amazonas
Også på NILU sin luftmålestasjon ved Trollhaugen fortalde vitskapsfolk om dystre funn. Spor etter skogbrenning i Amazonas var noko av det fyrste dei målte her.
– Dei store versystema fraktar forureininga heilt hit – til område som er svært sårbare med tanke på slik forureining, fortel seniorforskar Chris Lunder i Norsk institutt for luftforskning (NILU).
Gåve til jubilanten
– Vi forstår ikkje alt, og det er ikkje alt som gjev utslag som forventa. Men i det store biletet, så er altså dette eit kontinent som er utsett for global oppvarming, og som har ein påverknad som går langt ut over denne regionen, seier Jan-Gunnar Winther.
- Les også: Kongen klar for historisk Antarktis-tur
- Les også: Kongen besøker Troll
Det er bursdagsfest i Dronning Maud Land. Kongens besøk har kome i stand i samband med at det er ti år sidan Troll blei opna som heilårsstasjon.
Frå regjeringa får jubilanten ei gåve han treng. Statsråd Tine Sundtoft overrekte i dag ein ny radar som forskarane på Troll kan bruke til å finne fleire svar på korleis klimaendringane påverkar Antarktis.