Kongefamilien klar for julefeiring

Ifølgje Slottet skal kongeparet feire jul på Kongssetra saman med prinsesse Märtha. Kongssetra er kongeparet sin private eigedom på Voksenkollen i Oslo. Kongeparet vil 1. juledag vere til stades under gudstenesta i Holmenkollen kapell.

Måndag var familien samla til den årlege julefotograferinga i Den raude salongen på Slottet.

Dei siste åra har kronprinsfamilien veksla mellom å feire jul på Kongssetra, Skaugum og hytta i Uvdal. Dei kjøpte hytta på Fjellsnaret i Uvdal i 2007.

I dagane før jul skal kronprinsparet besøke barneavdelinga ved Drammen sjukehus. Dronning Sonja har i mange år hatt som tradisjon med ein førjulsvisitt ved ein institusjon eller hos ein organisasjon som ikkje til vanleg får kongelege gjester.

I år besøkte dronninga Bredtvet kvinnefengsel sist veke. Under besøket fekk dronninga ein presentasjon av fengselet og deira verksemd. Ho fekk også omvising ved fengselet, og ho møtte også innsette, melder NTB.