Tidlegare statsminister og Høgre-leiar Kåre Willoch døydde heime, måndag 6. desember. Han blei 93 år gammal. Willoch sette sitt preg på norsk politikk i over 60 år.
Han var statsråd i to regjeringar, generalsekretær og partileiar i Høgre, og statsminister i fire og eit halvt år, frå oktober 1981 til mai 1986.
Tysdag blir han bisett frå Ullern kirke i slo på statens rekning.
På grunn av koronapandemien er det berre inviterte som er til stades i kyrkja. Kong Harald og dronning Sonja er blant dei som er til stades. Det er også Høgre-leiar Erna Solberg og statsminister Jonas Gahr Støre, som begge skal halde minneord.
Omsorgsfull far
I minnetalen la sokneprest Jorund Andersen vekt på at Willoch var oppteken av å tileigne seg informasjon og sette seg inn i nye saker.
– Han var oppteken av at vi må kjenne historia for å forstå vår eiga samtid. Men også for å unngå å gjere dei same feila på nytt, sa ho.
Barna til Willoch fortalde om ein omsorgsfull og omtenksam far, som var til stades for barna. Han leste bøker og fortalde historier til dei då dei var barn.
- Minneord:
Også medarbeidarane hans fekk merke omsorga hans, fortalde Stine Willoch.
– Han var uroa for medarbeidarane dersom dei jobba utover kvelden. Han meinte dei burde kome seg heim til familiane sine.
Kåre Willoch fekk eit langt og innhaldsrikt liv, og fekk sette sitt preg på samfunnet.
– Mot slutten trur eg han kjente at han hadde gjort sitt og sagt sitt. Det er ei trøyst i saknet, sa Cecilie Willoch i sitt minneord.
Støre heidra Willoch
I sitt minneord la statsminister Jonas Gahr Støre vekt på den betydninga Kåre Willoch har hatt gjennom fleire tiår, både som politikar, embetsmann og samfunnsdebattant.
– Han hadde ein sylskarp kommentar, og var ein frykta motdebattant. Og det meiner eg som ein kompliment, sa statsministeren.
Støre mintest også debattane mellom Kåre Willoch og Gro Harlem Brundtland på 1980-talet.
– Dei vitaliserte norsk debatt, og auka interessa og forståinga av norsk politikk.
Willoch engasjerte seg i store og små spørsmål heilt til det siste. Han engasjerte seg blant anna for klimasaka og situasjonen for palestinarane. Støre sa at Willoch viste at det var mogeleg å tvile eller endre standpunkt i ei sak.
– Han var med det eit ideal og ei motkraft i ei skråsikker tid, sa statsministeren.
Endra Noreg
Høgre-leiar Erna Solberg sa Willoch hadde sett djupe spor i det norske samfunnet, heilt frå han blei valt inn på Stortinget som yngste representant i 1957 fram til i dag.
– Få har prega det ordskiftet i den norske debatten det siste halve hundreåret enn Kåre Willoch.
Ho seier Willoch var ei av dei tydelegaste konservative stemmene i Noreg. Han tok til orde for å spreie makta ved å gi meir makt til folk, og mindre statleg styring.
– Dette var grunnlaget for reformene han gjennomførte. I dag blir han hugsa som statsministeren som opna Noreg, sa Solberg i minnetalen.
Reformene på 1980-talet bidrog til fjerning av kringkastingsmonopolet, butikkane fekk halde ope lenger og liberalisering av bustadmarknaden.
Også Solberg trekte fram engasjementet Willoch viste, og sa at han ofte kom med gode råd anten ho var partileiar eller statsminister.
– Eitt av råda han alltid gav var å hugse at vi aldri måtte gløyme kåra til barnefamiliane. Det brann han for til det innstendige.
Men sjølv om mange minnest den offentlege Kåre Willoch, var han også ein familiemann, som var oppteken av å kunne kome heim til sin daglege middag.
– På vegne partiet Høgre, vil eg gjerne takke familien fordi de lét oss bruke Kåre så mykje som vi gjorde, sa Solberg i minnetalen sin.