– Det eksisterer ei slags feiloppfatning om at mykje kulturstoff ofte er smalt, at det er for spesielt interesserte.
Den oppfatninga vil Inger Merete Hobbelstad (41) til livs.
– Det handlar om korleis det er å vere menneske i verda her og no. Det handlar om samfunnet vi lever i, og det handlar om kvar vi kjem frå, fortel ho engasjert.
Hobbelstad har vore journalist og kommentator i Dagbladet sidan 2005. No startar ho i jobben som kulturkommentator i NRK. Ho innrømmer at det blir rart å bytte beite.
– Alle i Dagbladet føler seg som Dagbladet-folk, men eg har hatt eit sterkt band til NRK frå eg var bitteliten. Eg gler meg til å dukke endå lenger inn i den institusjonen, og gjere dei banda endå sterkare.
Opptatt av formidling
Hobbelstad har gitt ut fire bøker, og har ein mastergrad i litteraturvitskap frå Universitetet i Oslo.
Der skreiv ho oppgåve om Homers Iliaden, eit epos som blir datert tilbake til rundt år 800 før vår tidsrekning. Der undersøkte ho korleis handlinga har blitt tolka i moderne popkultur.
– Det er noko eg er veldig opptatt av. Korleis popkulturen speglar av det vi tenker og føler, og korleis vi treng å få gamle ting formidla for at vi skal forstå det betre og kunne relatere til det, seier ho.
- Les også:
Hobbelstad er for tida i foreldrepermisjon, men gler seg til å begynne i ny jobb. Jobbtilbodet fekk ho på eit venterom.
– Eg gav rett og slett frå meg eit lite gledeskrik. Eg trur det vekte litt oppsikt der eg var, fortel ho.
– Kjem til å bli ei tydeleg stemme
Redaksjonssjef i NRK kultur og underhaldning, Marianne Ytre-Eide, seier det var fleire sterke kandidatar til jobben.
– Vi er veldig glade for å få Inger Merete Hobbelstad inn i denne viktige jobben. Ho har brei og solid kompetanse innanfor kulturfeltet. Med sin glød og sitt engasjement kjem ho til å bli ei tydeleg stemme som set NRKs kulturjournalistikk på dagsorden og vil gjere publikum klokare, seier Ytre-Eide.
Hobbelstad har i fleire år arbeidd som kritikar og har stort kjeldenettverk i kulturbransjen, seier Ytre-Eide.
– Inger Merete har jobba med kulturjournalistikk i nesten heile sitt vaksne liv. Ho viser stor innsikt i mange ulike typar kultursaker og har ofte overraskande innfallsvinklar på sakene sine.
Tar over etter Moxnes
I september hadde mangeårige kulturkommentator Agnes Moxnes (67) sin siste arbeidsdag i NRK. Etter 35 år hos rikskringkastaren gjekk ho av med pensjon.
– Korleis blir det å fylle Moxnes sine sko?
– Det var veldig pene sko, viss eg hugsar riktig, seier Hobbelstad muntert.
– Moxnes osar av kompetanse og kunnskap, samtidig som ho klarar å formidle alt på ein roleg og tilgjengeleg måte som eg er sikker på at mange har sett pris på. Og så må eg prøve å ikkje måle meg for mykje opp mot henne, då trur eg at ein kan bli litt nervøs. Eg skal prøve å snakke og skrive på min måte og gjere den rolla til mi eiga.
- Les også: