Fryktar dei raud-grøne stansar nye vegprosjekt dersom dei får makta

Statsministeren prøvekøyrde i dag ein av dei nye tunnelane mellom Os og Bergen.

Prislappen er på over 9 milliardar kroner, og prosjektet skal stå ferdig neste år.

– Det er eit kjempeprosjekt som vil løyse eit av Bergens største trafikkproblem, seier Erna Solberg (H).

No fryktar Høgre-statsministeren for kva som vil skje med liknande vegsatsingar dersom dei raud-grøne vinn valet i september.

– Det vil bli stopp på store, viktige prosjekt, og vi veit ikkje kva som blir resultatet av det, seier Solberg.

Nye prosjekt kan gi 7400 nye jobbar

Nasjonal transportplan (NTP), med ei totalramme på 1200 milliardar kroner, blei i sommar vedtatt av Stortinget.

Denne satsinga kan gi omkring 7400 nye jobbar dei neste tolv åra. Det viser ein rapport som Samfunnsøkonomisk analyse har laga på oppdrag frå Høgre.

Store vegprosjekt fører ikkje berre til tryggare og enklare vegar for folk – det skapar også økonomiske ringverknadar, meiner Solberg.

– Det er mykje arbeidsplassaktivitet knytt til ei stor satsing på veg, seier ho.

Fryktar byggestopp

Samtidig fyrer Solberg laus mot dei raud-grøne, som ho meiner vil kunne innføre ein potensiell byggestopp.

– SV ønsker å bygge mindre veg og ha mindre av dei store prosjekta. Det har veldig mykje å seie for utviklinga på Vestlandet og kostnadsutviklingane. Viss MDG får makta, vil dei heller ikkje bygge store vegar framover, seier Solberg.

Partileiar i SV, Audun Lysbakken, meiner regjeringa prioriterer feil i dagens samferdslepolitikk. Kjem SV til makta, vil dei Hordfast, altså ferjefri E39, til livs.

– Det Erna Solberg gjer ved å påskunde Hordfast, er å setje dei andre prosjekta i fare, seier han.

Vil ha tryggare distriktsvegar

Lysbakken meiner det er langt viktigare å sikre rasutsette vegar rundt om i landet, som blant anna vegen mellom Arna og Voss.

– Det er kjempeviktig for oss å få ein samferdslepolitikk som er prioriterer det som er viktigast. Det er miljø og tryggleik. Vi vil ha trygge kvardagsvegar i distrikta, større jernbanesatsing og kollektivtransport i byane, opplyser Lysbakken.

– I staden for den veldig dyre og miljøfiendtlege motorvegsatsinga, som i stor grad handlar om å bygge digre vegar inn mot dei store byane, som Høgre vil ha det, legg han til.

– Regjeringa som set arbeidsplassar i fare

– Det stemmer at vi vil stanse motorvegar inn til byene, og flytte pengane til massiv satsing på tog, kollektivt, sykkelvegar og ladestasjonar til elbil, samstundes som vi foreslår meir enn regjeringa til å rassikre og oppgradere fylkesvegar over heile landet, svarer partileiar i MDG Une Bastholm.

Ifølgje Bastholm vil grøn omstilling og massiv togbygging skape arbeidsplassar.

– Tusenvis av oljejobbar vil forsvinne dei neste åra, men regjeringa har ingen plan for korleis desse skal erstattast. Det er difor regjeringa som set arbeidsplassar i fare, skriv Bastholm.