– Dei har støtta bestialske handlingar. Med viten og vilje reiste dei ned. Då meiner eg det ikkje finst tilgjeving for noko slikt, seier Sylvi Listhaug, konstituert 1. nestleiar i Framstegspartiet.
– Så langt strekk ikkje min nestekjærleik og tilgjeving seg.
Ho snakkar om kvinnene som dei siste åra har reist til Syria og Irak for å slutte seg til IS. No sit fleire av dei i flyktningleiren Al Hawl i Syria.
– Dei har ingenting i Noreg å gjere, seier Listhaug.
Men nokre av kvinnene sit der med opptil fleire barn.
Sprikande standpunkt
Statsminister Erna Solberg har lova å hente heim dei foreldrelause norske barna, men å ta det fulle ansvaret for norske barn med foreldre, vil ho ikkje.
– Eit barn er foreldra sitt ansvar, derfor prioriterer vi å sjå på foreldrelause barn med norske foreldre eller norsk statsborgarskap, sa Solberg førre veke, og ho gjentek det overfor NRK tysdag.
Det same seier partileiar Siv Jensen i forkant av Framstegspartiets landsmøte førstkomande helg.
– Barna er først og fremst foreldra sitt ansvar, ikkje styresmaktene, sa ho på ein pressekonferanse tysdag.
– Foreldrelause norske barn har ingen omsorgspersonar. Barn som er ilag med foreldra sine, har omsorgspersonar. Det er to heilt forskjellige ting, utdjupar partileiaren overfor NRK.
Usamd med KrF
Barneombodet har slått fast at å skilje foreldre og barn er i strid med barnekonvensjonen.
Kurdiske styresmakter seier at det er uaktuelt å sende barn til Noreg utan foreldra.
Og i helga vedtok landsmøtet til Kristeleg Folkeparti å hente både barn og foreldra heim til Noreg - og at dei ikkje skal skiljast.
– Det er klart det er sprikande standpunkt. Men eg har ikkje høyrd nokon seie at det er greit å stå med opne armar, seier partileiar Siv Jensen.
Jensen avviser at ho vil skilje barn frå foreldra sine.
– Det er det eg ikkje vil. Vi meiner at barn som har foreldre, er ansvaret til foreldra, ikkje staten. No må Frp få lov til å ta sin debatt om kvar vi skal trekke våre grenser, seier ho.
– Kvinnene er ikkje uskuldige
Jensen viser til at det vil kome opp nyansar i diskusjonane på landsmøtet. Ho spår at partiet vil samle seg om følgjande:
- at IS-kvinnene og IS-krigarar ikkje skal hentast til Noreg med hjelp av norske styresmakter.
- å hindre familiegjenforeining eller opphaldsløyve for folk tilknytt IS.
- å trekke tilbake opphaldsløyvet til dei med IS-tilknytning som har fått det.
Partileiaren er oppteken av at kvinnene som har tilslutta seg IS ikkje blir framstilt som offer.
– Det pågår ein underleg debatt om IS-kvinnene. Dei blir framstilt som uskuldige. Det er eg heilt usamd i, seier Jensen.
Ho understrekar at kvinnene har valt å reise til IS sine område heilt frivillig. Partileiaren vil ikkje gå nærare inn på kven som framstiller kvinnene som uskuldige, men seier at «samfunnsdebatten i stort blir prega av dette».
- Les også: